大家最近出街，不論時運高低都會看到慶回歸20周年宣傳品，電燈柱上、摩天輪下、碼頭蓋頂、巴士車身，撞口撞面，避都避唔到。美術設計繁雜老土，屢受批評。連設計大師Henry Steiner都狠批：「根本達不到國際標準。」早前立法會議員鄭松泰facebook專頁質疑，其中一款慶回歸「創意圖像」一撻撻底色來自素材網站，新聞處直認不諱。

鄭松泰議員斥政府「堆砌當原創」，絕非誇張。「慶祝活動」如斯大型，宣傳品卻用現成設計素材，毫不專業，真係好想瘋狂播100次Henry Steiner批評官方設計「垃圾」嗰句畀決策嗰位聽。政府新聞處書面回覆我們查詢，指該HK20潑彩創意圖像由他們設計組同事「設計」，承認色底從圖像網站購得，不過就補充一句是「經過處理」才應用。問到整個慶祝活動於設計方面花費多少公帑，就沒回答。

「㷫回歸」多過「慶回歸」
就此事我們訪問曾獲國際多個設計獎項的本地著名設計師蔡楚堅（Sandy），他說：「比較懶的設計師可能會這樣做，我冇興趣深究。嗰堆圖像設計點差，已經好多人評論過。我會形容做法好街坊會，好喜慶好熱鬧。呢啲設計唔使諗都做到，但如果政府認為香港回歸20周年呢件事好重要，係咪應該諗多啲？」香港沒設計人才？當然不。可是觀乎政府態度，似係靚唔靚唔重要，最緊要做咗！「如果當政府係client，佢哋知唔知自己想點？似乎一開始，佢哋已經畀錯direction設計師。你想講古仔，都要有古仔講先得；你冇古仔，有好靚插圖都冇用。我覺得浪費了向全世界展示香港設計可以做到啲乜嘅機會。」雖然可能好多市民「㷫回歸」多過「慶回歸」，但如果做得好好睇睇至少冇咁嬲。政府就係唔肯畀人唞下。

Sandy提到外國很多周年紀念活動設計皆出色，包括2015年新加坡獨立50周年國慶logo。「它當然不是非常非常好，但如果跟回歸20周年那個比較，你都會選它吧？」他又大讚今年第41屆香港國際電影節的logo設計。「用咗以前啲人寫嘅數目字花碼，有香港傳統元素，望落有現代感又簡單。」香港設計水平當然不只停留在街坊會，只要政府肯放手，香港設計絕對能登大雅之堂。

我們就HK20圖像用現成素材一事，也訪問了設計博客中央聖學子。他認為設計師總算有將素材拼合構圖，未至於非原創。「呢類小童都能製作嘅畫面，竟要上網download，除咗懶，我諗唔到其他原因。」他形容設計毫不專業，品味庸俗，影響市容（下刪千字），一出街就眼冤！

主權移交後，政府所用嘅政治視覺語言，佢以「虛偽」總結，「試圖以低水平設計粉飾太平，例如起錨、築福香港等。嗰啲創意圖像強調全城喜慶，你講就係呀？」
講起官方設計，佢諗起2002年政府發行紫色膠質新10蚊紙。佢覺得設計奇醜，又異於當時的鈔票設計系統，令設計業界嘩然。當年時任金管局總裁任志剛辯稱：「設計嘅嘢，見仁見智。」佢話：「行之有效嘅鈔票色系，一夜間徹底破壞。你估英國人會唔會有咁獨特嘅品味？」

記者：葉青霞
攝影：劉永發


20周年創意圖像周街都係，設計老土不在話下，潑彩色底竟然係圖像網素材，認真小學雞。


本地著名設計師蔡楚堅認為政府可能一開始就錯定方向，才生出各個不統一，沒內涵的設計。


走在街上隨處見到語法羞家的中英文口號，教授認為失敗得很。


蔡楚堅大讚黃新滿設計的第41屆香港國際電影節的宣傳logo設計。


英國皇家藝術學院175周年慶logo用了很多顏色，配合幾何圖形數字，不覺繁雜。古典徽號與新元素結合沒予人衝突感。


新加坡獨立50周年國慶簡潔搶眼，放在不同背景都很清楚。

http://hk.apple.nextmedia.com/realtime/supplement/20170521/56714571