http://news.hkpeanut.com/archives/26984
出文狙擊登峰老師
但篇文就比其他人屌到啪啪聲



老師為達成夢想見死不救，她的學生會怎麼想？︱夏目貝

香港花生

編按：三度攀珠峰的中學教師曾燕紅周日成功登頂，成為峰首名成功登上珠峰的香港女性。曾老師笑言登珠峰「沒甚麼特別」，但心情開朗，因終於達成為學生許下的諾言，也能證明給學生看「做任何事都要堅持，不要輕言放棄」，這正是為人師表的意義。她又憶述攻頂時風勢如八號風球，沿途曾看見屍體，觸目驚心。報導比較爭議的是，曾老師憶述登頂過程中看見一人坐在路上，「眼碌碌」望着她，「但我不能給他氧氣，因為給了他未必救到他，但我一定會死」。


老實講，我就唔識行山登山，更唔明點解明知咁高危都仲要上山，我唔太理解呢種係乜嘢壯舉，所以唔好以「葡萄」來指責我（近年好興一有人批評，就有人話批評者葡萄，唔知係乜玩法）。

「上得山就預咗有危險」um…或者係真，但冇人「預咗死」架嘛？所以有人話個情況似飛機上得一件救生衣，都係自己著，我唔太覺得係貼切比喻。如果將登山比作遇難，我就覺得上唔上到頂峰嘅人都係on9。而家唔係講緊兩個遇難嘅人，而係一個遇難嘅人，同另一個健全、仲有心有力繼續攻頂嘅人。

有人話點解要為咗一個陌生人，放棄自己夢想，同幾年來的人力物力投放？um…咁我咪覺得呢D位可以顯現出人性囉…

當然你去救，你未必救得到，但係有冇嘗試係一個重點。會唔會折返找其他人救援？會唔會嘗試通知其他人？就算咁做可能未必救到佢，但係至少有嘗試過。

但係呢位老師冇咁做，佢只係一心諗住完成佢夢想，返來可以同班學生認威。查實班學生有冇人因為佢攻唔到頂就死人塌樓？又或者覺得「因為miss可以攻頂，所以我考大學一定冇問題」？我覺得就唔會，曾經都做過學生，老師就算環遊世界上山下海，做學生嘅都可以冇乜反應，最多係羡慕同崇拜，但唔會因為咁就發奮圖強，所以大多都係老師自我滿足吧？

分一D氧氣俾佢，自己一定會死？佢冇預落山都要氧氣？嘗試救佢係咪會累死自己，我唔知，但老師肯定判斷到，救咗佢，自己今次就無法登頂峰。

佢冇殺人，但見死不救是事實。

我唔知佢返到香港，可以點同佢班學生分享，佢係見死不救先可以完成夢想。佢係咪會教學生堅持自己夢想，就算見到有需要嘅人都唔好理？而呢個唔係比喻，係實際嘅見死不救。

人嘅價值觀好玄妙，攻唔攻到頂係一種好虛幻嘅嘢，有座更加高嘅山d人又會去，就唔覺得之前嗰座好勁。又或者珠峰高多10米，佢哋就要爬多10米，矮10米，佢哋又早少少完成但都係登到頂峰。「第一」只是一個虛名，但生命是好實在的。我理解唔到有乜嘢個人夢想可以大得過一條人命，在此我強調是「個人」夢想，如果你嘅夢想可以對世界有好大嘅貢獻，件事可能唔係咁睇，例如佢冇救一人，係為咗救一百人，咁可能係唔同的。但攻到頂又點？個世界係冇改變到，冇人因為呢件事受到乜嘢好處，除咗佢自己之外。

如果我係佢，我以後唔會再教書，因為我覺得見死不救已經失去咗身為人嘅一D寶貴東西。或者佢可以轉行去做高官或商人，呢D都係唔介意犧牲其他人換取個人名利的職業。同時我都不會因為終於有香港女性成功登珠峰而感到甚麼光榮，因為見死不救而達成個人夢想，這種成功是空虛的。