大家好，歡迎嚟到十二夜嘅膠登社論系列。今日突然興之所至，想同大家講吓膠登嘅各黨各派。首先，經過本人呢排嘅觀察，膠登嘅黨派分為兩大類，一係政治/認真類，二係搞笑/輕鬆類。而喺政治/認真類入面，不得不提嘅就係膠登考古黨。考古黨曾經盛極一時，論人數，論氣勢，絕對係膠登嘅第一大黨，勢力甚至大到可以勇奪第九屆三個內務長席位裏面嘅其中兩個。佢嘅代表人物係柏積星丁卡咪同埋考古汗薛丁格，當然唔少得核心成員天氣將軍聯合組媽同埋紅面怪俠壹肆肆肆壹啦。而近期柏積星同埋天氣將軍已經退下火線，淨返嘅活躍成員就只係得返考古汗同埋紅面怪俠。所以而家考古黨嘅影響力亦都大不如前。

另一個政治/認真類嘅黨派就係保守黨，核心成員有天氣將軍聯合組媽，仲有看破紅塵小鹿班比。呢個黨派顧名思義，就係唔主張膠登有任何變動，維持現狀。

同以上兩個黨派截然不同嘅就係膠登暨內務改革派，呢班人近期喺番茄寶個連登post裏面開始湧現。改革派近期最轟動嘅舉動，就係憲制狂人張松溪嘅膠登憲制改革。當全登上下以為張松溪嘅唔做嘢廢除內務制政綱係玩嘢之際，佢就喺任期完之前發動改制公投，表示要對選民交代。佢作風大膽，作為改革派代表人物絕對係不二之選。