http://video.appledaily.com.hk/mcp/encode/2017/05/30/3357814/20170531_Vsub193NEWAD_clean_w.mp4


Henry逗趣地用舊式鬈髮器，替Wing整了一個花師奶髮型。

一間在彩虹坪石邨屹立36年的舊式理髮店，竟有一位白髮潮佬高廣富（Henry），架着黑框眼鏡，瀟灑又專注地為客人剪個靚髮，驟眼看絕對不像年過五十。洗剪吹，一般髮型師收$139，唯獨他收$260，在屋邨絕對算貴。但有麝自然香，商台前DJ、現為親子網上平台ohmykids的創辦人張詠妍（Wing）卻一試難忘，「呢個人認真研究我頭形，幫到我話事，即使住屯門或上水，搵佢剪髮都值得。」上月她經facebook專頁推介呢位高手，「一日超過三百幾個私訊。」作風低調的Henry謙虛道謝，表示個多月來，多了幾十位客人因為Wing的介紹慕名而來。

和一般屋邨髮型屋不同的是，這裏曾經因為一個人的形象聲名大噪──葉劉淑儀！十多年前的掃把頭，就是出自Henry哥哥的手筆。他及兩位哥哥承繼父業，經營髮型屋。他中學畢業後入行，負責女賓部，至於男賓部的剃鬚等技能就沒學過，主要由其他老師傅負責。他想提升自己，順應潮流，十多年前跳出彩虹，飛往英國Vidal Sassoon Academy修讀短期課程，「學校被世人認為好好，我只係一啲沙，吸收新知識後，都想客人感覺到自己唔同咗。」又強調：「最重要係跟客人溝通，客人開心，我都開心。」至於收費比其他師傅貴，他解釋是因應通脹而加，回流後平均一年多才調整收費，「你知我呢個價，我就會畀番呢個質素你，都叫過其他師傅加價。」客人種類包羅萬有，大多靠口碑相傳，縱然浸過鹹水，他沒想過自立門戶，「有人喺呢個屋邨幾十年，有感情，唔太捨得，加上我淨係識剪髮，要管理好煩。」Henry和哥哥堅守坪石數十年，一星期開六日工，每天工作八至九小時，有時忙到不可開交，採訪當天是周三例休，他才能氣定神閒受訪。至於未來計劃，他沒想過增加宣傳，只想做好本份服務客人，「呢行幾好，可以幫客人同自己扮靚，又有冷氣嘆。」他安於現狀，從容笑笑，有時不忘照鏡執吓個look，髮型師貪靚，客人髮型先四正。

以前在中環剪髮的Wing，後來搬家至九龍區居住，為遷就照顧女兒的時間，於九龍區尋找合心水的髮型師，屢屢撞板，尤其她留短髮更明顯，「要養成戴帽習慣掩飾。」幸好一年前誤打誤撞遇上Henry，一拍即合，Wing頭形小，要求Henry剪的髮型，可顯得頭形更大，他都一一做到。她解釋：「我相信舊式髮型舖，你喺一個地方能夠屹立咁多年，你一定有你嘅能力，技巧永遠都喺度，過時與否要睇髮型師會唔會接觸潮流。」店舖有用了數十年的德國蒸氣電髮器，亦有近年流行的Dyson風筒，果真與時並進。不過她喜愛店舖保持現狀，「唔使太新潮，乾淨企理就得。」Henry覺得還有點美中不足──使用多年的鐵閘生锈，拉起來有點不順暢，可能會更換，怪不得他形容自己：「做人要求不高，係對工作要求高。」堅持做好，即使隱身屋邨小店，一樣會遇上懂得欣賞的人。


高氏優美髮型設計，屹立坪石邨36年。


Wing平均個多月便來找Henry剪髮。


Wing頭形小，要求Henry剪的髮型，可顯得她的頭形更大。

高氏優美髮型設計
坪石邨鑽石樓地下105至108舖

記者：梁慧琳
攝影：劉永發

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁撚懷舊