http://video.appledaily.com.hk/mcp/encode/2017/06/02/3360440/20170603_Vsub255new_clean_w.mp4


好奇貓愛「打擾」何永富畫畫，不過貓奴相當受落，而且還因牠創作了這幅鄧小平名言「不管黑貓白貓，捉到老鼠就是好貓」畫作。

我有一個夢，夢想退休後可以做我喜歡嘅事，做到忘餓忘我。呢個夢我上星期開始有，受退休巴士司機、現職宅男的何永富啟發。如果人生勝利組由我定義，佢一定係傑出組員，因為佢有樓？唔係！係因為睡房以外佢仲有間畫室，每日瞓醒就可以走入去畫個不亦樂乎，老婆支持、阿女力撐，仲有貓主子陪畫，點計都係贏！

何永富經常四萬咁口，梗係啦，我係佢，我都開心。人生下半場可以把興趣盡情放大享受，令人葡萄。揸巴士廿年，佢舊年退休。60歲在現今世代只是young old，叫佢大叔貼切過伯伯，有心有力，要重回巴士公司兼職絕對冇難度，佢都有諗過。「好多同事退休後，都有返去繼續做，但個女叫我唔好再做嘢，鼓勵我多啲畫畫，佢話：『你自細鍾意畫畫，而家有機會啦。』」個女開到口，做阿爸嘅當然受落呢份甜絲絲嘅心意。加上阿女之前搬咗出去住，騰空房間，佢決定改建房間為畫室，畫架唔使再拆件收埋之餘，仲有空間掛起畫作展示。「好開心屋企人支持。有時都覺得奢侈，香港地有時咁細間房，要住幾個人！」阿女撐佢投入興趣，佢就自嘲因為有咗呢間房，搞到變咗宅男。「少咗出去行街，有時我一個人喺屋企，朝早開始畫，畫吓畫吓過咗午飯時間都唔知。」好多人退休怕冇嘢做好悶，自學油畫嘅佢剛好相反。「時間真係唔夠用，有時一畫就幾個鐘。」佢奉行活到老學到老哲學，不時上YouTube觀看繪畫教學影片增進知識，最近仲自學水彩畫，毅力，係毅力呀！

難得有間房可改建為畫室，佢決定搬走睡床，再建地台把大大幅的畫布、畫框收納妥當，空間感當堂加倍。地台上鋪上地蓆，阿女要回來留宿一樣冇問題。「之前喺客廳畫畫唔係太方便，畫完就要將畫架收起，而家隨時畫都可以，成日忍唔住走入嚟睇吓又畫吓。」房間有特大玻璃窗迎來陽光及綠油油山景，仔細聽仲有鳥鳴，成件事可以話係配合得天衣無縫。如果我有間咁嘅房，一定會望住外面景色發呆，進入渾然忘我之境。


畫室鋪了地蓆，留了被鋪，女兒要回家留宿不成問題。


畫室景觀開揚，窗外山林景致令他感覺更悠閒。


到訪何永富的家，對「室雅何須大」深感認同。

貓主子陪畫　作品富創意
雖則話佢走入畫室作畫可以忘掉時間，忘卻飢餓，不過總有被打擾嘅時候，之但係佢又心甘情願，貓奴生活就係咁。「有時坐喺度畫畫，佢就跳上我大髀，我就抱住佢畫。」佢作畫風格偏寫實，很多都是旅遊風光，也有創作成份較高的作品，靈感都來自貓貓，包括一幅帶有Andy Warhol風格的二次創作，畫中有佢教訓貓貓嘅情景。「畫嘅時候，佢搞咗啲破壞，就加咗啲貓嘅元素入去。」原來他們這一家喺今年農曆新年先收養呢隻來回地獄又折返人間、捱過車撞的流浪小黑貓，之後全家都變成一等一貓奴。活潑嘅貓貓之前跳咗上佢放顏料板嘅枱上，肉球沾滿顏料，貓仔通屋走，搞到貓印處處。「嗰次梳化、床單上都染晒色，以後都要記得掛起色板。」憶起此事佢丁點怒氣都冇，一直笑瞇瞇。「有咗佢好開心，好似多咗個人陪我玩咁。」

畫室外也有他的畫作，大部份都在門上。「早排裝修，浴室換咗一格格玻璃門，我就將睡房門畫埋一格格襯番，統一啲，當塗鴉咁，唔鍾意將來可以再畫過。我係無聊人嘛！」有閒情無聊，真係一種幸福。退休前做好準備，養一種興趣，唔係為打發時間，而係令下半生每一秒都更高質。


何永富是印度華僑，早前跟父親回去印度時，在街頭拍下了當地人照片，回家再畫成油畫。


何永富年輕時曾於廣告公司工作，後來公司遷到內地，為了生活穩定，才轉行當巴士司機。


房間特別建了地台，收納畫布、畫框及畫架，令畫室能有更多空間。


他自學油畫，愛畫風景，風格寫實。


何永富因貓貓搗蛋而有這幅二次創作，我笑畫中的他看來比真人年輕。佢話：「係呀，美化咗自己。」


1996年加入九巴公司的何永富去年退休，此前他駕駛了60X巴士線20年。




記者：葉青霞
攝影：張志孟
編輯：梁浩維
美術：楊永昌

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
唔錯呀