http://hk.apple.nextmedia.com/realtime/finance/20170606/56789445

羅馬集團（8072）人事重組
最新公佈
專業獨董林栢森出任行政總裁
美聯（1200）前副主席黃錦康，擔任首席策略官。

消息公佈後，羅馬集團股價就真係「應肚即飛」，半日股價最高見0.084元，午收0.083元，升22.1%，暫時成交金額787.8萬元。

提起黃錦康，實在不得不提佢嘅獨門神功「應肚即飛」！想當年，喺2012年倫敦奧運期間，花500萬推廣自創獨門太極拳奇招，示範一招「應肚即飛」，當師弟一拳打向黃錦康肚皮，即被一股彈開九丈遠，這叫做內勁！
唔好忘記，佢仲有一招千奇百趣省港澳嘅「隔山打牛牛牛牛牛牛牛」，首先師弟但成人鏈陣，黃錦康一運氣，一拳！哼！人鏈最後一人，就會被彈走。聽講，想當年亢龍十八掌都唔夠佢嚟呀（呢句係講笑嘅）！
話說，噚日黃錦康返羅馬集團Office，已經急不及待要向新同事表演佢嘅新絕技「一陽指」。聽講當時冇羅馬員工敢試（畀著係你，佢係CSO，你應該點俾反應呢？即係咁…傷到自己都唔知Claim唔Claim工傷好）最後黃錦康朋友身先士卒，估唔到一掂，呀朋友彈開四呎幾，果然功力深厚。
本報向黃錦康查詢，佢話「我呢幾年太極功力又提升咗，略施小技略施小技。」黃錦康話，想當年2012年接受《蘋果》訪問時，因為客觀因素，又唔想太大力傷到人，所以表現唔出澎湃力，點知就俾全城柴台。為咗一洗污名，所以佢呢幾年潛心修練，家陣內功深厚咗！佢話噚日去羅馬Office，有個同事推極都推唔郁個大隻仔，「我用手指掂一掂佢就彈走左…仲勁過一陽指，『應肚即飛』係初階，最上乘嘅武功係一陽指！」
佢話，「『應肚即飛』能量來自肚腩……但依家手指都發到力，呢幾年功力大增，真係多謝蘋果。」
黃錦康就話，佢今次出山都係緣份，認為公司需要Reengineering，佢主要負責訂公司發展方向同策略。另外，據悉，佢係唔收人工，而係做起左之後先分Option。


https://www.youtube.com/watch?v=VoewBlLMyKA