http://s.nextmedia.com/realtime/a.php?i=20170606&s=7018882&a=56791574

【涉大麻案遭起訴】T.O.P＠BIGBANG暈倒昏迷入ICU 至今未醒

正服兵役嘅韓國天團BIGBANG成員T.O.P，上周四被爆去年10月吸食大麻遭檢方不扣留起訴，而T.O.P就由噚日起被調職至第4機動隊。不過噚日T.O.P現身時面帶微笑，被網民批評他沒有悔意。

韓國方面今日傳出消息，指T.O.P今早失去意識暈倒，被緊急送到首爾某醫院嘅急症室。

香港時間下午4時左右，T.O.P被轉到深切治療部，目前仍未恢復意識。

據T.O.P身邊嘅親友表示：「T.O.P正檢查中，目前仲未有結果，但有服用藥物嘅可能性。最近發生好多事，加上轉到第4機動隊，應該係因為壓力太大，希望佢可以快啲恢復意識。」

及後T.O.P所屬嘅YG事務所表示：「T.O.P因服藥過度被送到急症室，目前T.O.P母親正喺醫院陪住佢，其他狀況未能詳細回應。」