http://video.appledaily.com.hk/mcp/encode/2017/06/12/3367695/20170613_Vsub400newnewAD_clean_w.mp4


辛宰牧（左）和兒子辛孝文都喜歡整車、賽車，現在兩仔爺最多的溝通便是買咩老爺車。

現年61歲的辛宰牧，在classic mini界無人不識，從改車、維修及辦mini賽車也是頂級老行尊，對車的熱情多年不變。兒子辛孝文（Simon）從小到大潛移默化被洗禮，在英國讀汽車維修後回流老爸車房齊齊整車。不但樣貌如餅印，性格亦然，從此車房成為父子之間的溝通戰場。

人稱牧哥的辛宰牧，由年輕時於土瓜灣車房做學徒，一路整車至今幾十年，愛揸快車的他亦曾落場參加澳門賽事，也跑過多年的港京拉力賽。年輕時尤其情迷classic mini，牧哥話：「我們95年開始就成立mini賽車會，每年都會出去外地比賽，一直堅持至今，當跟老友們聚舊。」去年就到了日本比賽，今年可能去泰國或馬來西亞，不過他現已退下來沒有落場，主力都是為36歲的兒子Simon安排，讓他多嘗試賽車。Simon說：「細細個已知道爸爸成日出去賽車，當時在電視見佢落場參加澳門賽事，覺得佢好勁，加上平時揸車都快，覺得老竇乜都強。」牧哥搶着為兒子套上光環，「佢技術也不俗。」直認年輕時為了車只顧自己玩，跟兒子的溝通不算多，偶有因傷不能落場才帶阿仔去澳門見識一下。Simon在15歲時就被送去英國讀書，都是透過電話問好，是最傳統的父子溝通模式。不過牧哥卻會加插訂貨環節，間中叫Simon於英國買車書、四處搵零件、搜購罕有classic mini。Simon稱：「細個搭火車周圍去幫佢搵嘢，到考了車牌買了我人生第一架mini，就可以去遠啲幫佢搵車。」


1905年的Ford Model T，沒有波棍入波，平常人都未必識揸。


70年代當紅一時的Ducati Desmo是牧哥人生第一部車，他將車一直保存至今。


平日少見的VW orange van在這車房中也變得平凡。


1986年時，牧哥曾經駕着豐田AE86出賽澳門。


1998年已在日本富士山賽車場舉行305mini車會大賽。


Simon有兩個兒子，直言細兒子的脾氣似足他。

因爭拗而溝通　共處而了解
逐漸兩父子都成為classic mini迷，無心讀書的Simon，卻跑了去進修一些汽車Service and repairing課程，之後更在英國開車房及成家立室。直至約五年前，Simon覺得兩個仔大定了，便回流返港於爸爸車房工作。牧哥說：「由細到大只想佢讀書，佢嘅興趣、喜歡做乜，我好少管。這裏工作很自由，又唔會限定佢幾時開工、整乜嘢車。」說到尾，同一空間，兩父子共事，又談何容易呢？加上阿仔所學的，跟老父所知的不同。牧哥笑言：「我同佢啲性格太似了，硬頸、執着、脾氣唔好，所以產生好多磨擦，經常有爭拗囉，哈哈。」Simon回應道：「因為時代不同，佢整車靠經驗，雖然我冇整過，但我會睇說明書及上網睇其他人分享教路，同佢講完，佢覺得跟自己經驗有出入，大家當然就會爭拗。」通常邊個贏多？牧哥答：「冇勝負之分，拗拗下大家唔出聲囉。所以冇辦法，大家只好各有各整，唔好搞亂。」父子情感宣諸於口，卻因爭辯而溝通，因共處而了解，牧哥指：「大家比之前認識深入了，以往很少在一起，佢去英國讀書，雖然知道在那裏有時會被欺負，也沒辦法，只好等佢學習獨立，讓他成長。所以那段時間的關係比較疏離，現在一齊工作就發現有很多代溝，需要慢慢磨合。」


1994年時牧哥揸住部mini參加555港京拉力賽。


Simon十年前結婚的花車隊的確夠晒壯觀。


最近捉了當年一齊上大帽山劈電單車的根哥，幫手翻新他的吉得利珍藏。

成副身家喺車度　兩代都整唔完
愛車如狂的牧哥每談到車，總會笑咪咪滔滔不絕，不過在兒子面前卻是一名典型嚴父，在夥計面前有時也會喝令兒子，「就係仔先可以鬧大力啲，現今啲夥計唔鬧得。」Simon坦言由阿爺、老竇、自己到仔仔，四代都脾氣臭，跟老竇共事已慢慢學懂體諒他火甚麼，「佢做事真的好急。有就有，冇都要快啲答佢，佢會再想辦法。俾老竇鬧都慣了，有時係自己同佢頂撞，我都學習緊唔好頂嘴。」現在兩父子溝通最多是買甚麼車，老爸越罕越喜歡，買手阿仔就負責搵料睇歷史。整間車房驟眼睇以為塞滿爛銅爛鐵，其實部部經典，70年代牧哥車牌都未有就儲錢買落的吉得利也一直保存，牧哥稱：「那時人工每月三百，一架電單車賣八千元。」最近還搵了當年一齊飛大帽山的根哥幫手翻新，不過最罕有都是一部1905年的Ford Model T，相信佢係全港最老的車。好多爛鐵，牧哥更會拆散晒它再翻新，「好多戰前戰後的車設計也很聰明，感覺好新鮮，在我而言，一邊整一邊拆覺得很有趣。」他笑言成副身家放晒在車度，做仔的，又會一直傳承落去嗎？Simon答：「連同一些零件車，估計都有80至100架，若然真的一直留下，我也要想怎樣保存。莫講佢一世整唔完，相信到我那一世也未必可以整完。」


近年復辦港京拉力賽，兩父子一齊落場。


在英國讀書進修汽車維修的Simon，現在專門幫人整classic mini。



老竇心目中的阿仔：
「好人，好純，30多歲人還是甚麼都不曉。希望佢唔好咁臭脾氣，做人圓滑一點。我們做老竇的，希望個仔唔好學壞，正常健康、工作開心就最好。我們這些年紀的人，一個個走了，自己也要看開一點。我走後，佢鍾意點就點，我控制不了。」

記者：許維雅
攝影：伍慶泉
編輯：馮秀珍
美術：孔文彬

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
現在 mini 都純電子