【Emily Online：打風了】南港島線轉手動駕駛　職員上車問車長：使唔使食嘢？

舊年12月啟用嘅港鐵南港島線，列車一向都係自動操作，不過今日「苗柏」襲港，天文台掛起8號風球，南港島線都轉咗人手操作，由車長控制開關門甚至行車速度，南區區議員區諾軒喺facebook話，見到有站務員上車問車長「使唔使食嘢」呀！


Emily去南港島線睇過，見到列車車頭一角圍起咗塊布幕，上面寫住大大隻字寫住「請勿打擾」，下面仲有兩行細啲嘅字，話「車務人員正處理事故，我們會盡快通知各位最新的車務狀況」，原來就係車長喺入面控制緊列車。Emily問過喺入面嘅車長，佢話除咗操作列車開門、閂門之外，佢仲會控制埋車速㗎。

區諾軒今晚都喺facebook上載咗一張相，話第一次喺南港島線見到「司機位人手開車」，列車駛到黃竹坑站時，更加有站務員上車，揭開圍住車長位置嘅布幕，問車長「使唔使食嘢」，不過車長可能為咗專心控制列車，只係好簡單答咗句「唔使」就算喇。區諾軒就藉佢個post感謝喺打風時為市民服務嘅人。

不過喺區諾軒個post下面，有網民留言質疑點解天氣惡劣時，要將南港島線改用人手操作，仲要用布幕圍住車長，擔心係咪列車設計或製造出問題，有其他網民就幫手解畫，話南港島線唔少位置都係露天，所以喺惡劣天氣下行車，就要派車長睇住列車前面有無障礙物等，而且自動操作系統好多時都處理唔到緊急狀況，因此天氣惡劣時都係搵返車長操控列車好啲。至於拉布幕遮住車長，就係避免乘客干擾到車長駕駛，同埋避免列車玻璃喺黑暗嘅隧道入面反光。

https://news.mingpao.com/ins/instantnews/web_tc/article/20170612/s00001/1497272282785