2017年06月16日
【沖繩暴雨連場】AKB人氣總選取消戶外舉行 指原莉乃：悲傷又震驚
日本組合AKB48今年舉行嘅「第9屆AKB人氣總選」原定明天假沖繩豐崎海濱公園沙灘舉行，可惜首次移師到沖繩戶外舉行卻出師不利，遇上當地天氣惡劣兼大雨連場，預測聽日嘅降雨量多達80%，更有雷暴警告，大會今日終於決定變陣，宣佈會改往室內嘅豐見城市立中央公民館進行，因為場地問題，到時唔會有粉絲及座上客，富士電視台就照原定計劃作現場直播，不過喺沙灘搭建嘅舞台就白費心機，而已賣出嘅門票都要接受退票。

AKB家族成員對於今次活動臨時轉場，今日即在社交網發表意見，上屆一姐指原莉乃於Twitter談及心情，佢自言感到悲傷又震驚，並向期待已久及受影響粉絲致歉。曾登上冠軍寶座嘅渡邊麻友，亦都對今次天雨關係而被迫變陣感到無言以對。