http://video.appledaily.com.hk/mcp/encode/2017/06/18/3372340/20170619_Vsub489newAD_clean_w.mp4


原本憧憬在30歲前到日本體驗工作假期，夢想隨諾諾的出現而化為泡影，Cyrus卻很享受這種家庭樂。

23歲，投身社會不久，事業起步，順理成章。而對鄒志文（Cyrus）來說，已是他成家立室之年。Cyrus笑起來露出兩隻虎牙，眼睛瞇成一條線，絲毫未帶歲月的痕迹；太太何珈其（Kaki）身形瘦削，把金髮綁起一條小辮子，戴着草帽，臉上掃了櫻桃色的胭脂，打扮像極個日本女孩。三年前，Cyrus與Kaki拍拖兩年，感情穩定，原定9月結婚，打算婚後養育小孩的兩人，第一次沒有做避孕措施就一撃即中，Kaki提早在婚前懷孕。

「冇諗過唔要，因為我哋自己都係想要小朋友。」當時Kaki才19歲，年齡卻從來不是他們的顧慮，第一個面對的挑戰，是要向家人交代。Kaki把當時的情境娓娓道來，「本身屋企係比較嚴，容許我拍拖，但係就連去人哋屋企都唔可以，一知道係好擔心點同我爸媽講。」過了媽媽那關，再戰戰兢兢告訴向來較嚴厲的爸爸，結果沒有被罵，只是叮囑兩人想清楚，好好計劃往後的路。

父母開通，卻曾經聽過不順耳的話，Cyrus憶述：「啱啱知道嗰日，我老婆就同咗我哋大家都識嘅朋友講，佢就偷偷哋同我老婆話，佢覺得咁早有BB就唔好喇，因為始終綁死住佢，同埋話假如有一日，我識咗第二個，走咗點算呢？」兩人當時心意堅決，並沒因閒言閒語動搖。兒子鄒卓諾（諾諾）出生後，偶爾帶他到酒樓飲茶時，也遇過好奇的旁人，「多數啲酒樓姐姐就會講，咁後生就做爸爸，咁大隻，搞唔搞得掂㗎，嘩你咁早就結婚……好似好唔符合佢哋大人入面嘅眼光。」事實是除了這些，他們都沒有遇過太多惡言，或者是他們根本沒有放上心，「就算啲街外人或者親戚朋友話，有啲說話聽嘅時候，我哋都會覺得，只要我哋負擔得到，生咗出嚟我哋照顧得到養到佢，有能力嘅話，都唔洗聽人哋講啲乜嘢啦。」臉上仍帶點稚氣的Kaki淡淡然道出這番話，確實來了個反差。


牙牙學語的諾諾，親他一下，然後說「I love papa」，爸爸聽着心裏應長出花來。


年紀輕輕已為人父，Cyrus自覺比以前EQ高了，衝動不再，為的是身教。


長着一副童顏的Cyrus，高舉起心肝寶貝，綻開慈父的笑容。

從來現實便是作任何決定的最大敵人。回想當年拍拖時，22歲的Cyrus在旺角開玩具精品店，經歷短暫的異地戀後，Kaki索性不再讀書，從新加坡回來後二人一起經營小店，然而生意普普通通，頂多只達收支平衡，發現懷孕後，他們忐忑，即使應付到頭兩年的開支，諾諾要上學校就一定不夠，所以把心一橫擴展生意，也度過了一段艱難的日子，「我唔喺到我老婆就繼續孭住佢（諾諾）喺前面收銀，我哋嗰時冇請人，因為負擔唔到。」

年輕過的都知道，青春是最大的資本，用之揮霍看想看的世界。原本憧憬在30歲前到日本體驗工作假期，夢想隨諾諾的出現而化為泡影，他們卻自得其樂，「冇得去working holiday，我哋又唔會話特別覺得可惜嘅，working holiday係可以去第二個國家體驗生活，而家冇機會去，但我哋依然可以帶埋諾諾去旅行，有啲朋友會話，其實佢兩歲前都唔會有記憶㗎啦，但我同太太都覺得，呢個記憶係屬於我同我太太，雖然小朋友可能唔記得，但係我哋帶住諾諾我哋一樣咁開心。」也許對Cyrus和Kaki來說，世界就是家庭，是諾諾。

路走得比人快，惟有提早成熟，Cyrus笑說：「以前細個返學成日都會鬧老師，同埋周圍打交，有咗小朋友EQ高咗，唔會好似以前咁唔思考就做，小朋友學嘢好快，可能我而家同我老婆講一句老婆，佢都會跟我講一句老婆。」身教要緊，警惕他們無時無刻做個好榜樣，生活除了工作就是照顧諾諾，為的是給予諾諾最好的一切，儲蓄不為物質，只為買樓，最大的心願是擁有一個安樂窩。


餅印般的兩父子。


活潑的諾諾在公園蹦蹦跳跳，Cyrus也不忘照顧他的責任，一時餵他喝水，一時為他抺汗。


年紀輕輕揹起一個家庭，三口子將迎來新成員。

為人父母，年齡畢竟也只是個虛數，Kaki說：「生小朋友就算乜嘢年齡嚟講都係第一次，所以冇話佢大個啲生嘅就會成熟啲，生完小朋友照顧小朋友，都係出自父愛母愛，唔關經歷嘅問題。」一步一步向前走，兩人準備迎接下一胎，「所有嘢都係有計劃咁做，佢而家成日都會話想要妹妹，佢始終獨生成日覺得好悶，前排商量過諾諾都大，隔咗三年係咪都差唔多。」

訪問完畢，兩口子拖着諾諾，小不點蹦蹦跳跳，嚷着要去冒險樂園。三人徐徐地步出公園，年紀輕輕揹起一個家庭，讓我剎時覺得，他們的身影越走越大。

記者：鄧天蔚
攝影：蕭志南

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily
[/url]

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
有錢生十個理得你