(圖片來源：https://chinesedora.com)

久違了嘅《叮噹法寶物理原理大解構》返嚟啦！大家有冇掛住個系列呢？(雖然小弟都知應該冇 ) 點都好，今次繼續同大家探討叮噹法寶嘅背後物理原理同喺現實世界入面嘅可行性

年代測定機 [/size=5]


年代測定機，又名年代探測機，最先出現在單刊本第44期《發現恐龍腳印》故事入面(好似係)。只要攞住佢將紙針對準目標，就可以知道嗰樣嘢出身自乜嘢年代。顯示器以類似科學記號嘅方式表示，上面嘅四位數字乘上10嘅下面一位數字嘅次方，就係該物件嘅年紀。(中學/DSE應該有教吧？)例如，測定機上方顯示「9025」、下方顯示「4」，咁年份就係9025乘以10嘅4次方，即9025萬，約九千萬年前嘅嘢。呢件法寶睇落好似好勁，好神奇。咁現實生活我地嘅世界又有冇類似嘅法寶或者科技呢？答案係有，而且其實我地嘅現實世界一早已經有呢種技術—放射性碳定年法，或者叫碳測年(carbon dating)。

呢項技術係用碳-14，一種同普通喺自然世界佔大多數碳-12一樣，但有放射性(radioactive)嘅同位素。乜話？有放射性咁咪好危險？放射性/輻射呢啲詞聽落好似好危險好恐怖，令大家聯想到核輻射，癌症呢啲嘢，但現實上其實有多嘢都有放射性同輻射，包括你、小弟同自然世界入面啲花草樹木、動物咁。碳-14其實同穩定冇帶放射性嘅碳-12、碳-13一樣，以有機混合物物質嘅形式存在喺自然世界入面。地球自然世界入面嘅碳-14主要係來自宇宙射線(cosmic rays)撞擊大氣粒子後產生嘅中子同大氣層中氮嘅化學反應，詳見下圖1

呢啲化學反應產生出嚟嘅碳-14本身唔穩定，帶有放射性，一定時間內有機會有β衰變，變番做氮原子，好似上圖2。不過碳-14放射性唔強，佢嘅半衰期長達約5730年，所以自然世界仍然會有一定數量多嘅碳-14存在。由於碳本身係有機物質不可或缺嘅原素，所以任何生命體都會固定地咁同大自然交流著碳-14原子，好似植物進行光合作用吸入二氧化碳，動物進食其他生命體呢啲過程咁。而生存過程中，生命體內嘅碳-14原子大概會維持住一個平衡，直至生命結束後不再攝取有機物為止，見上圖3。隨著生命結束，生物內嘅碳-14含量亦會因為衰變跟住減少。用儀器測量放射衰變放出嘅電子或者物件本身碳-14原子嘅數量，對比番生命體在生時嘅平衡數值，考古學家就可以推斷出有機物質本身嘅年代。