http://video.appledaily.com.hk/mcp/encode/2017/08/25/3426789/20170826_sub756newnewAD_clean_w.mp4


阿開一直經營有近五萬like的籃球page「另類漫畫」，今次二創《龍珠》為打工仔出氣純過癮，不作商業用途。

邊間公司唔苛刻？邊個波士唔抵死？香港打工仔，體內積聚爆標負能量，係好合理嘅。最近有個漫畫facebook專頁，叫「100億負能量戰士」，擺明車馬放負，仲要放足100億！版主林競開（阿開）將《龍珠》二次創作，講中晒打工仔心聲！

職場乃不可理喻之地，否則點解做晒嘢準時走會懼怕旁人目光；為何廢爆同事能夠得寵兼扶搖直上？阿開說：「最大負能量喺邊度出現？通常係從工作而來！」諗起負能量，佢聯想到《龍珠》於1992年推出嘅劇場版《100億能量戰士》，加個負字，套用於上班族，簡直係天衣無縫地悲情，幽默逐漸變黑，黑咗！佢戲謔《龍珠》奸角為老闆，把打工仔當成戰士。佢強調自己並非身處工作地獄，所以完全唔怕老闆見到啲畫興師問罪。「我出現得，就代表我冇呢啲問題啦，如果我喺啲咁嘅環境，仲點可能搞笑呢？」


準時放工被視作職場大忌，很反智。


每次六合彩攪珠，都讓一眾打工仔發番個美夢。


出得月薪過你，老闆就會覺得，你放假的時間，我都可以任用。

望中六合彩　似搵七粒珠
漫畫當中有個情節源自佢一位「戰士」朋友。「佢有段時間每日都喺放工前出一個status：拍枱，起身，收工！他係設計師，但入到去間公司，發現職責只係排版，其他部門同事又會左右佢嘅工作。收工嗰刻佢覺得唔得啦，要發洩。」阿開認為搵啲渠道排走怨氣，總好過逼自己一味正能量面對。漫畫中悟空拿起公事包霸氣放工，拜拜你條尾。現實中打工仔只能默默加班至天荒地老。

《龍珠》好多位都能對應香港打工仔處境，最有趣莫過於實現好多願望的龍珠，與香港人夢寐以求的六合彩一樣，都係七粒珠。可惜中六合彩難過去火星，對完唔中，炒老細魷魚願望落空，聽朝都係要準時返工，喊出嚟！

上司逐漸移後你條底線，員工放負人之常情，不過高高在上嘅佢反而怪你令公司氣氛變差，從來從來從來唔反思無間為員工製造負能量嘅，就係你呀腦細！受氣？好似話你份糧包埋㗎！阿開謂：「套用黃子華嘅一句，老闆應該諗吓賠償係咪不足！你做得越耐，負能量越多，份糧自然包唔晒啦！」日日憂鬱如周一？或者係時候諗吓你份工係咪真係適合你？願大家都有「拍枱，起身，收工」嘅勇氣。


每幅漫畫他都先用手畫再掃瞄到電腦做後期製作。


你能做到阿開朋友這個帖文般的霸氣嗎？



打工仔共鳴page
同樣以插圖經常引起上班族共鳴的專頁還有Nothing Serious，一幅圖加句夭心夭肺句子，一個post往往有幾千like。好工難求，睇呢啲page變得好治癒。

facebook：100億負能量戰士

記者：葉青霞
攝影：周芝瑩
（部份圖片由受訪者提供）
編輯：謝慧珊
美術：孔文彬

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
會比人告嗎