http://hk.apple.nextmedia.com/realtime/sports/20171001/57279285

政治不牽涉足球？講下好嘞！好似今晚西甲原定10點15分踢嘅巴塞隆拿主場對拉斯彭馬斯咁，因為今日係加泰隆尼亞獨立公投日，「獨派」巴塞要脫離西班牙政府，而拉斯彭馬斯就特登喺球衣上印上西班牙國旗，以示大一統嘅決心。據《馬卡報》報道，話巴塞方面拒絕踢呢場波，場波會hold住先（suspend），但就未講一定取消（Cancel）。

同時亦有消息流出，話如果巴塞拒絕派隊出賽，今場會判輸0:3，亦可能會遭西甲賽會停賽六個月。不過，據講巴塞球員想比賽，已經抵達球場，及後巴塞亦公佈埋正選陣容名單，美斯同蘇亞雷斯等都列陣，而拉斯彭馬斯仲早巴塞一步，同樣對外公佈出賽陣容。不過，因巴塞部份球迷要脅，如果比賽真的進行，便會由觀眾席衝下佔領魯營，為免出現騷亂，所以最後官方宣佈場波會閉門作賽，Now632台會喺今晚10:15按時直播。
當地今日已經引發唔少衝突，又橡膠子彈又扑頭咁，令今晚呢場波有好多政治表態。而且，據報西甲賽前傳統嘅兩支球隊聚餐，拉斯彭馬斯都拒絕出席，搞到巴塞好嬲，決定唔妥協。