前NBA球員K馬田（Kenyon Martin）無端端喺Instagram上載影片向網隊後衛林書豪（Jeremy）挑機，話Jeremy成日改變自己嘅髮型，係因為佢想做黑人。不過Jeremy並無因為K-Mart疑似種族歧視嘅言論而發嬲，佢嘅回應仲好大方得體添！

K馬田喺段影片入面係咁講嘅：「我使唔使提下呢條友仔佢個姓氏其實係Lin？我想講嘅係，夠喇喂，唔好再搞埋啲咁嘅嘢喇。我想話，佢唔可能靠搞埋啲唔同嘅髮型就入到我哋嘅球隊㗎囉，搵人同佢講聲得唔得？我哋明㗎喇，你想做黑人吖嘛！」

Jeremy之後喺Instagram寫咗篇文回應K馬田：「喂，無問題㗎，你完全唔需要鍾意我嘅髮型，亦都絕對有權講你嘅意見。講真，我好感激你會咁樣發表意見，我係有整過dreadlock，你身上都有中文字紋身，呢個就係一種尊重。作為少數嘅人，我哋越尊重其他人嘅文化，就越能夠影響到主流社會。多謝你以前為網隊同埋籃球壇所做嘅嘢，我細個屋企其實係貼咗你嘅海報喺牆上面㗎。」

K-Mart之後再po第二條片，相信用意係回應果啲批評佢嘅留言，K馬田仲話自己第段影片係講笑，唔係搞緊種族歧視喎：「林書豪大個仔喇，佢鍾意整乜嘢髮型都得，但咁唔代表我要鍾意，或者認同佢所做嘅嘢！」


http://hk.apple.nextmedia.com/realtime/sports/20171006/57296834