https://www.facebook.com/photo.php?fbid=10155821697171079&set=a.260431566078.171578.710961078&type=3

講真，我做體育咁多年，都唔會樣樣野都識，唔識就問，就學，最忌扮專家；但從來冇見過社會咁反智，大家一齊打幾粒字就判一個辛苦多年，打到幾乎盲的拳手落敗。

渣的對手你話渣，勁的對手你話老，開頭跌低你話抵死，打到眼腫你話輸梗，到最後死頂贏左點數，你又話造馬。成日話政府唔支持本地運動員，你地呢？撫心自問平日有幾留意，定係一年一次先裁判上身？

大佬，有拳例有醫生有裁判，一致判星如點數贏68:66，有網上16萬人+現場8,000人睇住，點樣造馬？你估香港政府，話搬龍門就搬咩。

唔識例可以學，少睇運動可以多Ｄ睇，香港人都唔撐自己香港人，網民個個都十足李司棋上身，「呢度唔係法庭，唔需要證據，我對眼就係證據！」嘩，真心威。唔少傳媒亦都鬥快出事，有錯post要更正，有23連勝，鬥快就係咁，同網民一齊未打先判。

你可以話我盲撐曹星如或者香港任何一位運動員，我認，因為我睇得太多佢地有幾辛酸。平日無人理，打生打死又話假，拍廣告搵食又睇唔過眼，真心為香港運動員悲哀，甚至係為整個香港悲哀。