http://hk.apple.nextmedia.com/realtime/sports/20171015/57334251

美式足球員卡帕歷克（Colin Kapernick）舊年喺美國接連多宗警察對黑人濫用暴力事件後，喺賽前奏國歌嘅時候單膝下脆以示抗議，其後有多名球員學佢咁做，而呢個行動更加去到德甲，哈化柏林正選球員星期六就喺主場史浩克04賽前喺球場上單膝下跪，連喺後備席嘅球員、教練同職員亦一齊響應。哈化喺官方Twitter上載咗球員單膝下跪嘅相，仲寫住話︰「哈化柏林支持包容同責任。為咗一個包容嘅柏林同開放嘅世界，宜家以及永遠。」

不過，哈化柏林喺呢場比賽畀史浩克04以2:0，同日德甲榜首嘅多蒙特亦畀RB萊比錫打破金身。多蒙特今場雖然有奧巴美揚開賽4分鐘就先開紀錄，但上半場已經畀萊比錫嘅沙比薩同尤素夫保臣先後入波而落後1:2，49分鐘桑奧古斯甸射入12碼令萊比鍚進一步拉開距離。雖然奧巴美揚喺64分鐘亦入番球12碼，但最終多蒙特都係輸2:3，今季第一次喺德甲輸波，主場41場不敗戰績告一段落。
多蒙特目前以8戰得19分繼續排喺德甲榜首，萊比錫少3分排第3，同日大炒弗賴堡5:0嘅拜仁慕尼黑就以17分排第2位。