老實講，我真係唔想係標題度打乜柒真人真事，咁不如大家就先當呢個故係流嘅先好嘛？

是咁的，我有位好多年前識落嘅朋友，佢叫夜漓，係網絡遊戲「星空幻想」嘅最高階玩家，又可以叫做神手。雖然今日係佢期待已久，三個月一度嘅季度活動，但夜漓竟然決定唔再坐係佢嘅電競座椅面前，望住佢上個月用左五千銀買嘅 4K 144Hz 螢幕；反之，佢選擇踏出佢屋企嘅房門，登上往機場方向嘅長途巴士，坐十點半鐘嘅因航客機，搭去日本嘅成田機場，懷住滿心嘅期待，試圖尋找一個佢素未某面嘅女人。

要做網絡遊戲嘅「神」，老實講，一啲都唔容易，技術、運氣、時間缺一不可。嚮啱啱網絡遊戲開始普及嘅時候，網絡遊戲尚係以包月制俾錢，即係玩家只需要比完月費，就可以用時間同運氣，換取到佢想要嘅道具，想要嘅所有野。但好景不常，網絡遊戲都會變，都會有沒落嘅一日，大部份嘅遊戲所用嘅付費方式都由包月改為「基本無料 課金制」，即係講就免費，實質就係要「課」：每樣正嘅勁嘅道具，你唔想花時間打，咁但係又想要，咁可以點？俾錢，就係你解決問題嘅方法。所以到左後來，要做「神」嘅話，除左技術、運氣、時間之後，仲加埋錢先掂。

嚮咁樣嘅制度之下，好多人，包括我，係拒絕嘅，首先我就無錢，二黎我亦唔會想花太多時間去農，去 Farm，三黎無技術，四黎無運；簡而言之，我就係乜都無，又唔想付出，即使可能有收穫，我都唔會去期待，即係所謂嘅不期不待，不受傷害。

但係作為一個「神」，就係要與別不同，就係要做一般人唔會做嘅野；夜漓佢係一個可以將以上四項條件全部投入落去「星空幻想」嘅「神」。佢每日會花十個鐘以上去打王、刷材料，將角色自身嘅每一項有用嘅能力值計到最盡，將每一件可以合得到或者刷到出黎嘅裝備精鍊精到最高階，去達至「神」嘅境界。搶唔到王？唔緊要，只要一日玩夠十六七個鐘，計好曬時間，總會搶到；計錯數加錯點？唔緊要，砍掉重練好快可以練過；精鍊爆咗裝？唔緊要，星矢仲有嘅係信用卡嘛。夜漓就係遊戲界嘅神，無人可以超越到嘅MMO最強玩家。識佢嘅話就知道 SAO、撈驚撈奶一D都唔現實。