iPhone X炒價大吹淡風，估計絕大部份人的心裏疑問，一定係機價會由最高的5萬蚊，下插到甚麼水平呢？

老實講，一日台及連鎖店的「後門機」未報價，都真係好難估到iPhone X的放售價！據以往慣例，大家手揸的iPhone，去到搵收機佬賣機，放售價一般都係「後門機」機價，再減上$500-$800，而呢個差額，就係收機佬當中所食的差價。

你可能會話，收機佬咪穩贏冇輸？都唔係架！機價上落有時可以非常快，幾百蚊差價都可以一、兩個鐘內發生，如果唔係，大家放機時，又點會成日見到放機價會上上落落呢？

「後門機價」未出台！咁大家又點知iPhone X放機價會下跌？其實這與早前盛傳iPhone X有可能炒上5萬有關；據知已經有水貨佬，被早前大炒iPhone X的消息所吸引，並搭好路從最多貨國家之一的美國着手，將引入美版水貨！暫時計算出來的引入價，「大機」256GB的到港價格，大概在$12,000至$13,000左右；所以暫估香港iPhone X的大機炒價，應該唔會高過呢個價位，否則大量入美國水機就得喇！

大家可能又會問，美國的水貨機到港又是否行得通呢？據水貨佬解釋，其實當年iPhone7高價時，都曾經引入過美國的水貨機，不過唯一留意點，是有美版機有「雙網」及「三網」兩個版本；基本上「雙網」版本，會同香港版的網絡制式完全冇分別，至於「三網」版本，就會多加CDMA網絡制式，亦即同國內版iPhone X完全一模樣。

記者：朱崇德

source : https://hk.lifestyle.appledaily.com/lifestyle/tech/daily/article/20171101/20200596
+++++++++++++++++++++++++++++++++++++++++++++++++++++++++++++++++
咁快轉風