講到炒iPhone X，一直以來都係一遍利好消息，最高場內有人話會炒5萬！不過臨出機前夕，終於「淡風」不斷；唔係要大家一定信，你亦可當場內人出口技想壓價，不過點都好，想知清楚iPhone X的價格走勢，都係應該了解當中細節。

說10月31日萬勝節這一天，「最嚇鬼」的消息，首數電訊服務商的「台機」終於到貨，意即Apple正式將iPhone X，交到電訊服務商貨倉內！

據場內人消息稱，呢部iPhone X唔止用家睇好，就連台都睇高一線，因為可以夾到客上台甚至加長服務合約；不過未出貨前，一直話貨量緊張，所以好多台主事人，都變得進取一點，入貨量較慣常「重手」一點，就算正式派貨時，供貨被打過七、八折，都夠機畀客嘛！

不過，正式到貨後一點數，今次Apple竟然好似黃大仙一樣，有求必應喎！所以變成好多台都有非常「重貨」的iPhone X，後果會係點？多出咗的iPhone X，當然好大機會成為「後門機」，轉落場內細舖，甚至經炒賣iPhone的「艇仔」，轉上國內銷售啦！

或者大家會問，可有甚麼證據台機貨多？好實質的證據就冇喇！不過據行內人稱，其實大家在預訂iPhone X時，有否發覺身邊朋友，「1-2個星期送貨」名額特別少呢？據知就是有部份貨量，分咗落「台機」方面，所以一般人都是「3-4個星期送貨」居多。

由於預計香港整體iPhone X數量，可能會比預期充足，預計機價會大大插水，價錢是多少？據稱台機方面，會在萬勝即後1至2日內報價，如果對炒價方面有興趣者，這兩天要特別留意。

記者、攝影：朱崇德

source : https://hk.lifestyle.appledaily.com/lifestyle/tech/daily/article/20171101/20200592
+++++++++++++++++++++++++++++++++++++++++++++++++++++++++++++++++
咁快轉風