日版《跳舞街》熱潮不止荻野目洋子率學生妹合拍鬥舞

荻野目洋子率學生妹首度同場合作《Dancing Hero》。

日本女歌手荻野目洋子近期人氣回升，噚晚更獲邀為NHK電視台直播音樂節目《Utacon》擔任表演嘉賓，與來自大阪嘅登美丘高校舞蹈部首度同台演繹名曲《Dancing Hero》。

《跳舞街》日版《Dancing Hero》於1985年11月面世，荻野目洋子憑歌曲走紅歌壇，更曾打入年度樂壇盛會《紅白歌唱大賽》。事隔30年，登美丘高校舞蹈部模仿騎呢女星平野Nora嘅復古娘Look參加第10屆日本高校舞蹈大賽，配上《Dancing Hero》強勁節拍，近月來在網上帶來極大迴響，喺YouTube已累計有1,100萬次觀看次數，仲帶挈原唱嘅荻野目洋子工作量大增。

《Dancing Hero》可謂唱到街知巷聞，荻野目洋子亮相NHK節目《Utacon》，令佢事隔廿多年再有望打入《紅白》，呢次上節目，NHK就為佢重溫當年主演晨早劇《凜凜》嘅珍貴片段，之後戲肉終於拍住登美丘高校舞蹈部同台。呢班學生妹再以招待復古打扮現身，佢哋表示部份成員係問媽咪、外婆借舊衫裝身，48歲嘅荻野目洋子雖然勁舞不及妹妹仔，但歌藝仍然冇得頂，更決定下星期三起於網上推出11個版本嘅《Dancing Hero》，12月仲以CD形式發行。