近排肥通被人列為不受歡迎人物，因為我做咗炒賣iPhone X的「淡友」！繼噚日開出美國水貨版iPhone X到港價格，大概在$12,000-$13,000左右，而香港的炒價，亦有可能會跟從後，好多人都認為我有幫手壓價之嫌；我明嘅！由10萬、5萬、2.5萬……最後2.5萬炒價仲要拆半，的確令人難以接受。

冇法啦！為咗平息眾怒，今次肥通搵嚟一個較利好消息。在11月1日，「公司機」價錢終於出爐；所謂「公司機」，其實係泛指一些電器連鎖店，同一啲可直接從Apple攞貨的大戶口放出市場的「後門機」，由於他們的貨量多，好易會影響到iPhone X的放機價格。

今次「公司機」放出的價格，好有一種「彈弓手」的感覺；在11月1日的十點零鐘開始，他們標出了第一口價！感覺相當不俗，64GB版黑機、白機為$16,000，而256GB版還高上$20,000！不過大家留意者，「公司機價」是指同業間的拆貨價，如果大家去搵收機佬賣機，一般人的賣機價要在「公司機價」上減去$500-$800，以作為收機佬的毛利。

以為就此完結？原來問題陸續有嚟！由10點開始截至下午一點，「公司機」的大莊一共出了4、5口價，機價還有不斷下跌之勢，最低位見於同日的中午12點，64GB版黑機、白機，都只有$13,000，而256GB版黑機、白機則為$14,000！

不過中午食飯過後，可能有關大莊發現兩款不同容量價格太貼近了，所以最後在下午1點鐘，再報出了64GB版為$13,000，而256GB版則為$15,000，總算較早前的報價稍作上調。

「公司機」報價後，機價是否完全明朗化？其實都仲未算，據知最快到11月2日，「台機」可能會有新報價；這當中會有一定隱憂，因為據知今次台機數量非常多，當中尤以「C記」最重貨，另外「三仔」亦對VIP客戶，開出了$498月費兩年約的低盤口，以$0機價出機，據知好些台還做緊$598月費兩年約的高價呢！所以這些小動作，亦有因貨多而想快走之嫌；所以還在等待中的「台機後門機價」，絕對有影響往後iPhone X放機價的決定性因素存在。

記者：朱崇德

source : https://hk.lifestyle.appledaily.com/lifestyle/tech/daily/article/20171102/20201543
+++++++++++++++++++++++++++++++++++++++++++++++++++++++++++++++++
咁撚貴