【明報專訊】香港科技大學經濟系前系主任及榮休教授雷鼎鳴前日出席「回歸20周年——國家與香港」研討會時，提到內地科技進步，舉例話有朋友「『叫雞』都可以拎部手機出嚟照（付款）」，言論引起爭議，事件仲引發雷鼎鳴同民建聯葛珮帆（EQ）隔空唇槍舌劍

事緣雷鼎鳴發表「叫雞」論時，民建聯婦女事務委員會主席葛珮帆係台下聽眾，EQ事後批評雷喺公眾場合唔適合用呢啲字眼。

雷鼎鳴噚日喺電台繼續堅持自己用字「好啱、好準確」，自言「素來主張思想自由」，佢認為言論有自由，不應設無聊限制，但要有底線，「不可隨便攻擊其他人」，雷鼎鳴並形容EQ「思想太古肅」。

EQ聽到雷鼎鳴嘅說法就更不滿，佢同Emily講，雷鼎鳴「把女性性工作者形容為動物，極之侮辱！」EQ又反問「點可以用言論自由死撐？」，奉勸「大學者都要尊重別人」。