https://video.appledaily.com.hk/mcp/encode/2017/11/09/3480162/20171110_Sub820newnewAD_w.mp4

香港人睇電視，比較少接觸汽車廣告，但在外國就周不時都會有。有些就拍得好激情，有些則以抵死得意做噱頭，務求在短短幾十秒內放大部車的特點。不過，有時並非所有觀眾都會受落，上月底英國有一條標致（Peugeot）的廣告，片中女主角傳了一條短訊給正在開車的男主角，那條短訊出現在中央螢幕上，本來是賣部車的連接功能，點知有觀眾投訴開車睇短訊會分心，之後男主角單手握軚做了幾個得戚手勢，又被話是危險動作，聽落好似好荒謬，誰不知最後當地Advertising Standards Authority（ASA）真的出手禁播。就算標致解釋中央螢幕處於水平視線相當安全，睇短訊無異於調校收音機或冷氣，短暫單手握軚也無異於伸手轉檔，不過都無補於事。

其實早前同樣在英國，有條Audi R8的廣告一樣收投訴，有人話部車開得太快太進取，ASA就話將速度跟刺激感劃等號就屬違規，超跑喎，唔通拍到時速50km/h？當然，有些被禁的是比較有道理的，例如在2014年，北愛爾蘭交通部拍了一條宣傳片，想提醒市民自2000年起，已有31位小童死於超速所引致的車禍，畫面中一班在樹林內玩緊的小朋友，被一部失控衝入來的私家車壓倒，雖然沒有血肉橫飛的鏡頭，但一樣睇到人心寒，所以最終被禁在晚上9時前在電視播放。當然，講到禁片，保時捷都有一條好經典的911廣告，自己睇片睇到最尾啦，成年人一定睇得明的。


就是這個手勢，被人投訴不安全駕駛。


一班小朋友被超速失控的私家車壓過來，的確幾嚇人。

撰文：Dolly Lam

source : https://hk.lifestyle.appledaily.com/lifestyle/car/daily/article/20171110/20210139
+++++++++++++++++++++++++++++++++++++++++++++++++++++++++++++++++
唔係寫住叫人唔好試