炒又炒唔起自用又太貴

令不少「果農」大跌眼鏡的蘋果 iPhone X，一開售已經燶味十足，搞到不少炒家叫苦連天，加上蘋果一早閂定後門，早兩個月前，已經列出不准退機條款，散戶就更加進退兩難，而且 iPhone X多個設計都一改傳統，例如全屏幕加 Face ID，都要重新適應，就算想升級自用，始終機價太離地，認真要計過度過。

創辦人都唱淡

被不少外國傳媒唱淡的 iPhone X，收機價一沉不起，難怪就連過去「逢機必有，逢有必早」的蘋果創辦人之一 Steve Wozniak，都直言唔睇好 iPhone X，甚至打破過往慣例，未有新機上市第一日就買機自用，原因是擔心 Face ID技術未夠成熟。

雖然實際試用後， Face ID成功「認面」指數頗高，但下載 app時，要先按兩次開關掣，才能靠 Face ID進行認證，用落仲煩過 Touch ID。



機側銀色邊相當老土，好似返到 iPhone 3年代，兼且鏡頭非常突兀，完全設計大倒退。



要下載 app，首先按兩下開關掣，先開到個 Face ID，仲麻煩過用 Touch ID。

又有殘影又細咗

而 iPhone X開賣未夠一星期，就更加爆出屏幕醜聞，被發現屏幕於長時間顯示同一畫面後，會出現「影像烙印」及「影像殘留」情況，就連官方現時亦未有解決辦法，仲話「色彩和色相有些微偏移，是 OLED的一項特徵，屬於正常現象」，甚至叫用家更新 iOS、使用自動調整亮度及不使用時關閉屏幕，完全治標不治本，睇怕廠方短時間內都無辦法根治問題。

而且， iPhone X的 OLED屏幕，偏色情況相當明顯，整個屏幕偏向青色，加上「先天缺陷」，屏幕上方的黑位，更令觀感大受影響，尤其是在瀏覽網頁時，屏幕好似「俾人咬咗啖」。

雖然廠方聲稱 iPhone X屏幕尺寸為 5.8吋，理應比 iPhone 7 Plus，甚至 iPhone 8 Plus的 5.5吋大，但實際用落又係另一回事，因屏幕尺寸以對角線計算，所以全屏的 iPhone X只是數字上取勝，兼且不少 app都未支援全屏顯示，其「實用面積」大概只有 5吋，以為換咗大芒？其實仲細咗。



天生「崩」了一忽的 iPhone X，睇網頁時依然「健在」，非常礙眼。



採用 OLED屏幕，偏色情況相當明顯，拍埋部舊機睇，白色竟然變青色。



不少 app都未支援 iPhone X的全屏幕，上下都有條大黑邊，實用面積其實只有約 5吋。

飛走 home掣仲麻煩

設計與別不同的 iPhone X，由於沒有 home掣，操作亦都要重新適應，首先要返回主畫面，需由屏幕底部向上掃，大拇指的移動幅度，比按一下 home掣大得多，除非想大拇指關節更靈活，否則開番個 Assistive Touch比較穩陣。

由於「向上撥」已被用作退出 app之用，所以控制中心亦要讓路，只能從屏幕右上角拉下，而從左上角拉下則是通知列，麻煩程度大增。



要開啟通知列，要由左上角拉下，控制中心則要由右上角拉下，操作實在不方便。



iPhone X講到明支援無線充電，而且售價又貴一大截，但隨機竟然連無線充電座都欠奉。

撰文攝影:劉耀祥

[email protected]

來源 source: http://hk.next.nextmedia.com

+++++++++++++++++++++++++++++++++++++++++++++++++++++++++++++++++

咁貴