https://hk.entertainment.appledaily.com/enews/realtime/article/20171121/57482115

邊個話「有樓有高潮」？呢方面完全唔係港男港女揀對象嘅條件！

《蘋果動》主辦嘅全新配對節目《愛情DQ掣》正公開招募，目前已經有過百人填咗表參加。根據參加者提供嘅資料，「有車有樓」並唔係佢哋主要考慮條件，只有兩成半女士希望對象有車有樓，男士就只有3%有呢方面要求。

反而，單身貴族都睇結婚生仔為首要條件，話「以結婚為目標」同「願意生小朋友」嘅，男女都分別佔七成同五成！

而對對象嘅要求，六成男士都希望對象同樣「以結婚為目標」，五成希望對象「願意生小朋友」，而女士就以結婚為主，七成希望對象「以結婚為目標」，近四成要求對象「願意生小朋友」。

除咗結婚生仔，單身貴族仲有其他要求，包括希望對方「識煮嘢食」、「經濟獨立」、「穩定收入」、「鍾意小動物」等。八成半單身女士都希望對象有「穩定收入」，逾七成希望雙方「經濟獨立」。相反，不足五成嘅單身男士喺呢兩方面有要求，反而過半希望對象「識煮嘢食」，睇嚟都係「入得廚房」嘅女仔受歡迎啲！