其一，未解決到一個問題。就係，非建制派初選結果產生之後。選舉主任就DQ佢，理由係莫須有，例如好似何志光噉同本民前合照過就等於支持港獨。噉又有咩後箸呢？到時候可能已經唔夠時間重新初選，而如果推得票第二者參選，得票第三者可能就會認為自己嘅票源與第一者相近，於是不服第二者，因此依舊要出選。噉又點算呢？

其二，而家好明顯係非建制派之內有至少兩條路線，支持者係好難勉強支持另一條路線。而另一方面，初選嘅產生辦法嘅持份者嘅光譜成分與被DQ當事人嘅光譜嚴重不符。於是青政、本民前嘅支持者絕對有理由到時候反臺。佢地而家之所以沉住氣，可能係因為佢地覺得自己支持嘅人（一定唔係支持過11政改嘅兩民黨）有可能贏初選，從而令其他不同路線嘅選民都會票投佢地支持嘅人。

其三，我建議要加入一個規則，要保證投過票畀其他現任直選議員嘅選民唔可以投票（包括九西嘅黃碧雲、毛孟靜、劉小麗，以及九東嘅嗰五位），以口頭形式保證，噉先夠公平。因為噉係相當於由投過票畀梁游嘅選民再次決定是否支持原來嘅決定，於是解決咗游劉有無過失，光譜遠近影響初選結果以及防止非建制派進一步撕裂等問題。而投票畀譚國僑、范國威等落選候選人嘅選民依然可以投票，一來係因為佢地無自己嘅代議士，二來係因為噉做相當於再搞一次雷動計劃。