https://video.appledaily.com.hk/mcp/encode/2017/12/17/3506775/20171218_sub276newAD_clean_w.mp4


學校距離教師宋煒烈（左）、麥頌文（中）、梁騰鋒合租的單位約5分鐘路程。

香港地，工揀你，你都可以揀工，地點車程工時，統統在計算之內。為了一份工，甘願只在周末出城做一兩日都市人，然後拖着買餸車仔載數個飯盒回大澳，平日晚上叮飯果腹……應該沒太多人能想像是甚麼一回事。為節省每日來回四、五小時的交通時間，在大澳覓得教席的80後梁騰鋒、90後麥頌文、宋煒烈，決心搬入大澳。

簽租約時才相見　互相遷就零磨擦
大澳這所中學已落成40年，當新老師入職，學校秘書會替他們開設WhatsApp群組，提供業主聯絡方法，方便他們搵屋夾租，現時三人所住單位，每月　租金6,000元，200呎兩房一廳連天台，由宋Sir尋得。他走遍全大澳供租住的單位，拍照放上群組，講好價錢，其他人覺得合適就舉手認頭。就這樣，他們仨成為同屋住，初次見面就是簽租約之時。

相見好同住難，連見也未見過就決定住在一起，不難嗎？大學畢業不久，曾住宿舍的麥Sir自言比較易適應，「當住多年宿舍。」而另外兩位無同住經驗的阿Sir，早亦明瞭做到「同住好」的方法。梁Sir笑說：「我哋唔係中學生去旅行，扭計要同邊個一間房，大家都明白自己嚟呢度為乜。」他還大讚，「兩個同屋主都真係好易話為嘅人。」看過他們早上起來的情況：麥Sir負責煮早餐，淥急凍水餃烏冬，宋Sir特意早起梳洗，免得三人同時輪候一廁浪費時間，而梁Sir負責洗碗，看似和諧，真的做到零爭拗？他們異口同聲說：「真係冇，遲啲唔知，哈哈！」

空氣好物資缺　凡事有辣有唔辣
去大澳的人，多半在日落前後離開，酒樓食肆也多在天黑後一、兩小時關門。教師這種工作，並非「學生放學，老師放工」，工作至晚上八、九時甚至夜深是家常便飯，幾位阿Sir的晚餐，堪稱母愛的體現。打開雪櫃，飯盒堆積如山，原來是家人為他們準備的，每個周日晚上從市區帶回大澳。晚晚捱飯盒，真的別無選擇？「頭兩個星期，我哋會去啲未閂嘅食肆，七、八點出去，條街黑到好似出面（市區）凌晨咁。」他們漸漸發現，這裏的食肆很有性格，「鍾意就掛個牌話休息，慢慢都唔敢再博！」麥Sir入得廚房，不包辦晚餐並非自私，而是連買食材的機會也沒有，「呢度個街市好早閂，我地放工嘅時候佢又放工，咁我點買嘢？」照記者所見，晚上八時左右，的確只剩一、兩間食肆營業，每晚花錢重複吃幾味，倒不如吃愛心飯盒，至少多一份心意。

有時工作不太忙，可以早點回家，他們就會跑到天台。天台除了用來晾衫，更是他們放鬆身心的天堂。在光害不嚴重的大澳，舉頭望到的不只明月，還有滿天繁星，梁Sir說：「平時壓力大，一睇住星星，你可以好平靜。」三個大男人夜觀星象所聊的，每每先是教學，再到自身，或許這就是阿Sir的浪漫吧。在大澳住了兩個多月，梁Sir最愛這裏空氣好，「空氣好到我返市區會喉嚨唔舒服。」唯一不喜歡的，就是購物不便，「買乜都要出東涌，連買盤肥牛都係。」雖然如此，他並不抗拒居於大澳，「所有嘢都係有辣有唔辣，住市區係方便，但都可以話要忍受空氣唔好。」在大澳才能獨佔一房的宋Sir周末出市區，一日陪家人，另一日就陪女友，笑言：「好牛郎織女，一星期先見佢一次。」女友最初都有微言，後來明白他入大澳的原因，慢慢也接受了。

或許你會說：「教書起碼兩萬幾蚊一個月，畀我我都肯入去啦！」潮流興向錢看，如果市區學校有同樣的聘用條件，他們還會留在大澳嗎？最年輕的麥Sir答道：「老師考慮嘅條件，係學生嘅質素，佢哋係咪真係有心讀書，呢樣先係真正影響到一個老師應唔應該留喺大澳，抑或出去市區教嘅因素。」


早餐由麥Sir負責，一般都是簡單的急凍水餃和即食麵等。


客廳花巧佈置不多，只有摺枱、梳化等簡單家具。


雪櫃塞滿飯盒，是三人平日的晚餐。

記者：李煒汯
攝影：林正言
編輯：陳慧玲

source : https://hk.lifestyle.appledaily.com/lifestyle/special/daily/article/20171218/20245750
+++++++++++++++++++++++++++++++++++++++++++++++++++++++++++++++++
講到咁正