https://video.appledaily.com.hk/mcp/encode/2018/01/21/3531208/20180122_sub786newnewAD_w.mp4


豹姐跟好多人一樣，貪快走球場側的長樓梯落柴灣道搭巴士出市區。

【專題籽：一周突襲】
領展去年年尾一次過以230億賣掉17個屋邨商場，股東開心，市民憂心。柴灣興民邨禁語：「呢度有乜食？」一講就會被邨民圍剿。鄭太：「呢度乜都冇！食又冇！我對腳做了手術，要繞大圈才回到家，梗係嬲！」街坊B：「想買盒飯都冇，好唔方便囉！」街坊C：「講又點吖！都冇用，嘥氣啦！」

領展於2016年以2億元將興民邨商場賣掉，去年農曆新年後，最後一間麵包店結業，剩下一間百佳、一部ATM機，同停車場的流動牙科車，真係想買盒飯都冇。邨民靜坐、抗議，一度引起討論。一年後，原定重開的商場依然一片狼藉。房署說這裏交通尚算方便，一程小巴可以落山；百佳有小量餸賣，ok喎，但問題不只如此。

晨早7點，一班公公婆婆，拖住買餸車在排隊等小巴。精神好的如豹姐，會行樓梯落山飲茶買餸。興民邨三座樓依山而建，在山坡下的民逸樓，邨民可行15分鐘下坡路到鄰邨；或10分鐘上坡路到電梯塔，乘電梯落山，再走20分鐘斜路到市中心。

住了三十多年的豹姐日子有功，拖住部車仔健步如飛，但中途常偷捽膝蓋。「以前我們每朝6點半跟街坊飲茶逛街市。街市好細，同侍應與店主都好熟，那是長者社交。?家街坊只路過講Hi和Bye，靜了好多。」小公園、小巴站前，坐了一班街坊吹水發呆，其實都冇乜好做。「佢哋有啲買完餸喺度唞吓，有啲就等街坊幫忙買餸/飯回來啦！」豹姐也為鄰居買餸，顧慮到要拖上山，以前買兩餸一湯，現在一菜一魚就算。

獨居長者家中「餓死傳說」
她的鄰居伯伯，每天坐梯口請落山的街坊幫忙買飯，一等兩個鐘。「行動不便的，連落樓下逛逛的動力都冇。咁真係會越來越隱蔽㗎！」上星期天氣冷，兩個獨居長者家中暴斃，邨民盛傳他們是餓死的。是誇張？是誤傳？可以肯定的，是大家的怨氣與擔憂。超級市場外的長椅成街坊的「城市論壇」，「商場一約滿就截電！圍板剩番條米半左右通道，又逼又黑！我哋去房署嘈咗4日，先裝番啲路燈咋！」坐在黑暗棋枱角落的冼伯伯：「我話知佢整私人商場整到好靚吖！圍板圍到啲路又窄又曲折，冇燈黑麻麻又大塵！快啲啦！和合石都向我招手了！」也許被遺忘的感覺，才更讓邨民火大。

在邨裏住了18年的陳佩霞（Angel）前年曾在facebook發起靜坐抗議，更成立「山民主義」專頁跟進，經常跟港島東區區議員徐子見研究商場圖則，又諗辦法改善問題。曾要求房署為屋邨提供穿梭巴士，但被拒絕；希望在平台搞一周幾次數小時的墟市，被指沒場地；有社會服務機構（NGO）提供飯盒給長者，Angel說：「房署以『會引致人群聚集的秩序的問題』而拒絕。」


1982年入伙的興民邨，位處柴灣山坡上，樓高43層，曾是全港最高的公屋。6,100名居民中，超過1,000個是老人家。


超級市場外，是唯一的有蓋休憩空間，常有邨民圍坐聊天。


鄭太：「現在商場都圍了板，主要通道變得九曲十三彎，我腳痛，很不方便呢。」


Angel稱曾遇過恐嚇，攞塊抗議標語出來就被保安圍問。

興民邨：柴灣柴灣峽大潭道188號

記者：陳慧敏
攝影：傅詩涌、Leo@BBFilmmaker
編輯：彭錦明

source : https://hk.lifestyle.appledaily.com/lifestyle/special/daily/article/20180122/20279705
+++++++++++++++++++++++++++++++++++++++++++++++++++++++++++++++++
好慘