現年41歲嘅簡慕華，2000年選港姐入行，曾經係金牌監製戚其義愛將，拍過《金枝慾孽》、《火舞黃沙》同《心戰》等劇，演技備受讚賞。與此同時，簡慕華亦同阿戚傳緋聞傳咗十幾年，舊年2月簡慕華拍完無綫劇《超時空男臣》之後決定離開娘家向外闖，但過去一年冇乜再聽到佢近況。

低調過後……原來簡慕華已經做咗人妻！不過新郎並唔係阿戚，而係另有其人，佢今個月4號喺微博貼咗自己同老公嘅相，留言話：「We do. We did. Forever and always.」（無論過往及將來，我們一直相愛）

今日《蘋果》聯絡到簡慕華，佢話其實喺上年4月結咗婚，點解o依家先喺微博公佈喜訊？簡慕華話：「因為我一直喺加拿大，冇喺香港，呢排返咗嚟香港，你返到嚟香港始終有機會俾人見到你喺街㗎啦，所以就趁呢個時候公佈囉。費事喺街俾人見到拖住，問邊個嚟㗎。」同老公拍咗幾耐拖？佢話：「幾年㗎啦，但識就識咗好耐，係中學同學。只不過佢移咗民去加拿大，好耐冇見，幾年前佢返嚟香港，原先係同學聚舊，咁啱佢又回流香港做嘢，同學聚會開始多聚會，又好似幾啱傾喎，不如試吓一齊啦。」問到老公姓乜，佢話老公係圈外人，唔知老公鍾唔鍾意公開。講到生BB問題，佢話小朋友唔容易湊，要好多心機同體力，覺得自己未必適合，所以唔計劃生BB。

簡慕華舊年2月離開TVB後，究竟o依家狀況如何？簡慕華話：「好想離開TVB隔一隔，出去refresh吓睇多啲唔同嘅嘢，我諗住繼續做番呢行，但想轉吓環境，所以冇同TVB續約，揀到自己鍾意工作先至做。」

簡慕華同戚其義傳緋聞傳咗好多年，噚日有傳媒報道話影到戚其義好悶悶不樂行街，全因為知道簡慕華已經結婚。簡慕華笑住話：「我啱啱先至同阿戚打波。」對於多年傳佢同阿戚緋聞，簡慕華就話：「其實講咗好耐㗎啦，不過既然大家咁愛戴，咁我哋冇所謂啦，得啖笑，大家friend冇所謂。」佢又話老公都識得阿戚㖭。

戚其義同簡慕華傳咗好耐緋聞，簡慕華話大家好熟，唔介意俾人講下笑下。（資料圖片）
https://hk.entertainment.appledaily.com/enews/realtime/article/20180211/57821280