https://video.appledaily.com.hk/mcp/encode/2018/02/12/3547639/20180213_sub397newnewAD_clean_w.mp4


農曆新年前夕，好多洗車屋都會大排長龍，如果環境許可，還是買支洗車槍自己動手洗吧。

農曆新年前要洗車，相信係好多人的習慣，不過以往經驗告訴我們，要排一條長長的車龍，甚至趁此機會sell你逾千元的連打蠟套票，的確令人深有體會；肥通成日做嘢都係死線一刻，所以我冇去洗車屋好耐了，都係自己的車自己洗！更重要是摸住每一塊車身，人車交流更多，對車的損耗情況了解更深。

香港自己動手洗車係好煩，由地方的選擇以至水源等問題，都好似逼人走入洗車屋，不過如果有地方條件及時間，買支高壓洗車槍，洗架細車都只係半小時的問題，而且近年洗車槍價亦唔貴，亦可減輕你不少體力的消耗，今日肥通就找來了三支市面最多人用的洗車槍，試作一個簡單的比較。


今日找來一起評測的，還有數碼潮流產品達人——阿志（右），及汽車愛好者——Ian（左）。


多功能12V洗車神器$400


洗車槍連水箱設計，是好多人淘佢返嚟原因，夠方便！而且跟機還有氣石喉，只要駁上水槍位，還可以用作養魚，釣友們一定喜歡。

第一支測試的是「多功能12V洗車神器」（$400），行現時最流行的12V設計，水壓／使用時間為4 Bar/40分鐘，配件有水桶、水桶蓋（連泵）、6m水喉、養魚起泡浮石、泡沫部件×2、洗車槍、洗車擦、USB充電變壓器、12V汽車點煙插及12V汽車點煙插轉換器。


噴泡槍嘴還使用雙頭設計，好專業。


但打泡效果一般，泡唔算濃密，有些藍色的洗車液還見直接流出來。

老實講呢支洗車槍都相當家喻戶曉，淘寶熱銷之餘，甚至香港都有舖返貨嚟賣，第一樣係佢有個連水箱設計，一般車好多時都會預個水箱放車尾箱，有佢就已經做到；最正是十多件洗車設備全部放晒入水箱之內，擺放好歸一！不過更神者，係佢仲有魚泵養魚功能，釣友一族應該好喜歡，而且箱身紮實，還可以當凳仔來坐，以$400價錢有以上功能，的確就算佢唔識洗車，我都覺得抵玩。至於洗車能力，基本能有打泡及洗車能力，平心而論，打泡能力只是一般，雖然使用雙頭花灑噴泡，而且還刻意做窄了喉管加強水壓，不過仍未能做出打「雪花泡」的效果；至於最後過乾淨水的洗車功能，我覺得是稱職的，就算水壓是一般家用式的4 Bar，不過由於到這一刻，好多污迹都應該被起出來了，所以絕對夠用有餘。


4 Bar的洗車能力絕對足夠應付，而且按掣的深淺度，還有花灑及直線出水的水力調校。


超前位便攜式洗車神器$680


所有喉泵及配件，都可收入小鐵箱之內。

第二支測試的洗車槍是「超前位便攜式洗車神器」（$680），電壓一樣是12V，水壓／使用時間：4 Bar/60分鐘，而配件分別有洗車泵、6m水喉×2、洗車槍、充電變壓器、12V汽車點煙插及扇形噴嘴。

可惜呢支水槍在淘回來時已被判死刑，因為肥通開箱時竟然發現有缺件！而且是十分重要的噴泡配件，我做唔成噴泡測試之餘，對比上一支「四嚿水」的多功能釣魚箱，配件多佢一倍有多，嗰下感覺是有搵笨之嫌！話說呢支槍在早年曾有超高水壓的美稱，聲稱4 Bar用到60分鐘亦比釣魚箱強，不過實際使用感覺，我只可說兩者分別不大，而且還要加上金屬箱設計，刮花後亦有生銹的潛在風險。

最最後測試的一支，是現時網上非常熱議的「WORX二代型號 WU629」（$1,580），電壓使用更高的20V，水壓／使用時間有兩個選擇，分別為6.5 Bar/60分鐘及22 Bar/40分鐘，而配件分別有6m水喉、洗車槍、變換射水模式槍頭、泡沫槍頭、4.0電池、2小時快速充電器及45cm長杆。


洗車功能基本與「多功能12V洗車神器」，不過淘返來時卻欠了噴泡沫配件。


WORX二代型號 wu629（$1,580）

一開機單論外形，WORX可以講贏九條街！電泵整合入槍身，令洗車時拖少一個機箱，只要配個水箱就可以了，的確在操作上多了一分瀟洒，不過價錢係稍貴的，逾千元的機價，的確是一個幾大的投資；不過使用上是滿意的，首先試噴泡，打出了有如雪花一般的細滑小泡沫，而且泡沫「掛」車時間近5分鐘都係一點點消退，好處是能讓清潔劑浮起污迹，亦係先前兩支洗車槍做唔到的，最後是過水時，22 Bar的水壓真係要小心運用，水與空氣的運合越多，使用上會更慳水及潔力更強，不過如非必要，都係建議用返6.5 Bar好了，一來使用時間會長啲，而且洗車水亦不會大範圍濺及鄰近的汽車。大Bar數反而建議使用在洗軚軨及「鮑魚」位會更實際。


水槍之內藏入了高壓水泵，一體成型！不過用家要另配水箱。


噴泡功能超強，打出雪花一樣的泡沫，令污迹浮起來。


水槍有多種噴射闊度，令不同車身環境都可配合使用。

最後作總結，論洗車功能可以說是一面倒，WORX的各方面能力是最強的，不過問題都是價位高；相對如果你的洗車位鄰近有車，$400的多功能釣魚箱是一個幾好的慳家首選。如果你都係洗車槍玩家，或者心裏還有一個疑問，為何地上最強的Karcher K2 FollowMe（1,800人民幣、約港幣：$2,300）不見了蹤影？話說肥通自去年11月開始，透過洗車用品店與香港行貨聯繫，原本說會在1、2月間在香港推出行貨，不過最新收到消息，可能要再等至3、4月才會推出，就數值上非常吸引，電壓為36V，水壓／使用時間為50 Bar/20分鐘，而配件有高壓水泵主機、槍柄、高壓水喉、扇形噴嘴；老實講，如果你架車唔係「地盤車」，相信都未必需要咁大Bar數去沖泥迹，估計打泡能力會非常強！不過使用拖車仔的水泵設計（連水箱），都是有人喜歡或不喜吧！


22 Bar的水壓非常強大，不過要小心唔好噴到鄰近的車輛，否則就令人感到神憎鬼厭。


22 Bar再試洗軚軨，直接就洗乾淨了。

查詢：Bidlike（深水埗福華街175號福仁商場1樓17號舖）

記者：朱崇德
攝影：蕭志南

source : https://hk.lifestyle.appledaily.com/lifestyle/car/daily/article/20180213/20303655
+++++++++++++++++++++++++++++++++++++++++++++++++++++++++++++++++
幾好用