原來再多嘅心理建設都係無用
明明都唔係第一次面對死亡
貓大哥走個陣，可能走得好突然
悲痛嘅感覺強烈但唔算長久
但貓小子走前，經歷咗好長時間嘅治療
每次總有好轉嘅希望出現
活蹦亂跳幾日，好轉幾日，又突然狀況變差
覺得自己每一個決定都係錯誤
好似連鎖反應咁，一步步將貓小子推向深淵
我覺得異常內疚，一直係到諗
如果當日唔帶佢去太平道，再多問幾間
貓小子係咪唔會變得情況咁壞
仲可以有一線生機？
就算最終要走都可以舒服地走，可以係屋企由我哋陪住走
而唔係好似依家咁，係陌生環境到痛苦離開

我好記得最後急救完，貓小子已經神智不清
但仲貓叫咗幾聲，好似想搵我哋，唔想走咁
直到我哋同佢講，如果真係太辛苦就唔好再勉強自己喇
我哋都知道佢好叻，佢真係好捱得，我哋會再見面
貓小子先慢慢窩咗係我哋懷抱入面，慢慢咁合埋眼，慢慢咁走
到我哋帶佢返到屋企，個身都仲係溫暖

我覺得自己害咗一個生命
呢種諗法係我腦入面完全揮唔走

點解人永遠都要後悔
點解呢個世上無如果
點解所有選擇都好似無選擇咁
點做都係錯......