https://video.appledaily.com.hk/mcp/encode/2018/02/22/3553773/20180223_sub545newnewnewAD_w.mp4


1973年建成的筲箕灣街市，將在今個月28日晚上8時正式關門。

食環署轄下，位於筲箕灣東大街、電車總站對面的筲箕灣街市，1973年建成，原本樓高兩層，有八十多個檔位，但現在卻十室九空，除了一些檔口用作貨倉外，只剩下兩檔仍然開門做生意，因為空置率高，政府決定收回這座接近半世紀歷史的街市，將在今個月28日晚上8時拉閘，關門大吉。

今年69歲的鍾太，是其中一個留守到最後一刻的檔主。她從事海味生意廿多年，曾在街市外面做過「走鬼檔」，也租過排檔，但因為經常加租就沒有再做，她十多年前在筲箕灣街市投到一個檔位，就決定回去開檔，她深知這個街市人流不多，做的主要都是熟客生意。


69歲的鍾太，十多年前開始在筲箕灣街市開海味檔，賣的大多都是由相熟船家供應的本地靚貨。


鍾太每天一早都會到魚市場拿貨，之後開始劏魚，打鱗、開邊，醃魚，很多功夫。


她親自曬的鹹魚沒有添加防腐劑，夠晒原味。

鍾太是水上人，父親是香港仔的漁民，後來她嫁到筲箕灣，就開始在這邊生活。她店內所賣的，大多都是由相熟船家供應的本地靚貨，她又幾乎每日都會親自曬鹹魚，每天一早，她都會到魚市場拿貨，之後就開始劏魚，打鱗、開邊，醃魚，將每條馬友的腸和血管剪掉，「我喺船長大，以前出海曬鹹魚、曬魚乾，所以我識做囉，但得我一個人做，做唔到好多，求其做十幾條魚來賣就算數，有啲熟客會打電話留貨，噚日就有客一次過買咗8條，做呢啲好多功夫架，自己整就冇防腐劑，好新鮮。」她邊劏魚邊說。



鍾太暫時未有打算另覓檔位開檔，可能退休了。

曬完鹹魚，她就開始拿出一籮皮菜魚乾整理，將頭尾剪掉，她又邊剪邊喃喃道：「未剪嘅一斤賣45蚊，剪咗嘅一斤就賣90蚊，但本錢都要60蚊，兩斤剪埋得一斤剩，唔係賺好多，不過求其啦，呢度平平哋租，如果計人工真係計唔掂呀。」她又教記者怎吃皮菜魚，「浸一陣拎去蒸，加少少豉油，或者滾湯，用來煮蘿蔔又得，我哋水上人先識食，你哋唔識食，會鯁骨，我有時都叫啲客唔好買，我畀幾條佢哋返去試吓先，食完個個都話係喎，好甜喎，我哋船大架嘛，乜都食架，有乜食乜，哈哈。」


街市內原本有八十多個檔位，但現在卻十室九空。

街市內人流很少，街坊通常都去附近的金華街露天街市買餸，偶然才有一兩個熟客入來坐坐、聊聊天、看看報紙，對於街市被收回，鍾太只能無奈接受，「有乜感覺呀？咪唔捨得囉，當然有感情啦，呢度又乾淨企理，又冇人理我哋，但唔可以唔畀佢收番嘛，政府嘅嘢。」其實食環署早在去年7月1日已將大部份檔位收回，但在區議員協助下，幫鍾太及幾個檔主爭取到延至農曆新年後才收回，好讓他們有足夠時間清貨，「政府有叫我哋揀其他地方開檔，北角、鰂魚涌嗰啲，我唔去之嘛，出面競爭好大，又要請伙記，租貴要賣得多嘢先頂到皮費，以前出海已經好辛苦，我而家唔做咁辛苦啦，不過仔女想我繼續做，話我唔做會好悶，我又唔識得打麻雀，睇吓點啦，我自己一個人做，做得幾多得幾多，如果租金貴或者唔適合就唔做，退休咯。」


街市內另一間仍然營業的紙紮舖，下月起會搬到愛秩序灣繼續做生意。

街市內另一間剩餘的紙紮舖，則已經開業三十多年，不願出鏡的檔主黃生說，自從政府幾年前開始不再出租吉舖，他就知道會有收回的一日，「繼續做，政府就賠45,000蚊，優先揀檔，唔做就賠51,000蚊，即係你唔做就畀多6000蚊你使，政府認為6,000蚊可以食過世，年紀好大嗰啲檔主咪接受囉，真係會做嗰啲就當然唔肯啦。」黃生已決定下月會搬到愛秩序灣街市繼續做生意，到時租金比現在貴得多，因為還要支付冷氣費，黃生帶點氣憤說：「民生死，但領匯（現為領展）不死，領匯係生架，如果冇咗呢個街市，街坊就一定要捱貴嘢。」有指筲箕灣街市將來會改建成老人中心，但黃生說：「政府嘅嘢點會落實丫，到時又會拖返三五七年先搞。」

記者：黃子配
攝影：王國輝


source : https://hk.lifestyle.appledaily.com/lifestyle/special/daily/article/20180223/20312376
+++++++++++++++++++++++++++++++++++++++++++++++++++++++++++++++++
記得以前去過筲箕灣街市，好鬼土炮