定啲嚟：呢篇嘢絕對、絕對冇劇透。我只係覺得《復仇者3》至今牽起嘅「全球性劇透恐慌」非常有趣，純粹喺度同大家分享現象。

全球毒L驚到停止上網
你哋有冇諗過「世界末日」係點嘅呢？作為動漫、電影兼收嘅毒L，我可以好肯定答你：「冇得上網。」互聯網相等於毒L嘅生命維持器，提供日常所需所有流行文化資訊；一旦掹電掣，到底毒L可以存活幾耐，醫生都唔敢答你。但係執筆之時，世界各地居然有為數不少嘅毒L自願停止上網。唔知，仲以為有電腦病毒威脅全球。而能夠讓大腦直駁電腦嘅毒L冒生命危險「斷網」嘅，只係一齣區區兩個半鐘嘅娛樂片：《復仇者聯盟3：無限之戰》。

為咗迴避任何網上可能出現嘅《復仇者3》劇透，我好多friend如臨大敵：買定4月25號香港首映早場飛只係基本措施（有冇因此「射波」就唔知嘞）；趕唔切早場，或者因為各種原因要遲幾日睇嘅朋友，好多已經誓神劈願，暫時停用所有社交媒體，甚至完全戒絕互聯網。有資深毒L仲特別提醒：其實劇透早喺美國時間23號就會特襲，因為當日當地會有紅地毯全球首影。真係要斷，就要23號開始斷。
咁都未算癲。我網友「力劉」話，旦凡Marvel戲佢都習慣攤兩、三個禮拜至入戲院睇，務求舒舒服服享受，唔使同人迫。即係話，佢可能「斷網」長達三星期。我非常擔心佢呢段時間嘅身心狀況。就連佢本人都表示：「應該會死，慘過唔飲水。」本來我打算充當社工，定時跟進呢位client，但係佢唔上網，我唔知可以點跟。

反劇透法西斯：導演呼籲斷網
喺Marvel故鄉美國，情況更誇張。喺Twitter就有唔少網民表示對劇透者「雖遠必誅」。更甚者，有網民甚至嚴正聲明，會block晒任何劇透嘅暴徒，老友都冇情講。

至於出品《復仇者3》嘅電影公司Marvel Studio，直情當自己打緊間諜戰。拍攝期間，全片76個主要出場角色當中，只得飾演Dr. Strange嘅Benedict Cumberbatch睇過完整劇本；即使係MCU系列台柱Robert Downey Jr.(Iron Man)，都只係望過自己演出嘅部份（可見Dr. Strange今集係貫穿劇情嘅橋樑）。咗擺明信唔過荷李活A級演員，有關方面似乎對有機會接觸劇本嘅人都起疑心，不惜喺劇本加入誘敵嘅「假場口」，盡量混淆視聽。有傳佢哋仲專登喺網上散佈「假劇透」，目的同樣係擾敵。我個Marvel死忠friend「Winston」就話，呢啲稻草人除咗係掩護，仲可以幫有關方面追蹤劇透者。頂，真係好似打緊仗……

防暗箭之餘，Marvel Studio自己亦出明槍：早喺4月初巡迴宣傳期間，導演Russo兄弟就喺網上發表公開信，呼籲睇咗曝光片斷嘅fan屎同傳媒唔好爆料。信上面仲有「Thanos demand your silence」嘅hashtag，希望大家唔睇僧面都睇大奸角「魁隆」塊面。
不過最重磅嘅「反透核彈」，都係兩兄弟上星期一出嘅tweet──入面講到明，如果你完全唔想被劇透，直至入戲院之前最好都係唔好上網嘞。由官方人員親自呼籲斷網，合唔合理真係見人見志。

此外，Marvel Studio仲專登搵返《復仇者3》嘅卡士拍宣傳片，主題都係勸大家封口。成個campaign搞到「Take嘢衰硬」咁嘅勢，除咗捍衞觀眾「不知情權」，估計亦想兼收宣傳之效；個人認為呢種玩法相當聰明。

劇透恐怖分子！？
無論電影公司定Marvel fan屎，搞到精神緊張咁款我都可以理解。畢竟講緊嘅，係21世紀最重量級系列嘅高潮戲，而且蘊釀期超過十年，難怪大家瘋狂避地雷。更何況面對網聯網同社交網絡，劇透真係避無可避。

我知大家諗乜：講到劇透，我哋呢啲做媒體嘅亦唔見得輕手。但若然做過傳媒就明白，呢個真係供求問題——如果冇讀者想睇，自然唔會有人透，一切都係回應市場。更何況睇與唔睇，你至係老闆。今時今讀者已經好醒──邊份報紙透得勁，邊個網站爆得甘，好多人早就瞭如指掌。要避，一定易過你避開成個互聯網。

好多毒L之所以索性短期斷網，唔係因為一份半份報紙雜誌，而係怕咗避無可避嘅業餘網民。相信呢段期間你隨便走入一個熱門討論區，都可能睇到劇透；最攞命係有啲友仔劈頭喺標題就透晒關鍵劇情，真係洗腦都洗唔切。不過呢啲都唔算大鑊，大家至多上少幾日forum。

真正大鑊嘅，係近年外國竟然出現有計劃、傳播力強嘅劇透，情況儼如「劇透恐怖分子」！呢啲人心態如同《蝙蝠俠》嘅小丑──放雷對佢哋完全冇好處，唯一賺嘅只係破壞人哋雅興嘅快感。喺專攻流行文化嘅社交網站Reddit，就有暴徒利用hashtag，喺無關痛癢嘅subreddit（內容分類）入面播毒，博你冇防範中招。好在，好似Reddit、Twitter呢啲社交網都有過濾功能──用家可以透口過設定block咗某啲網頁，有啲站仲可以block埋關鍵字，咁就唔怕招。可惜我哋中坑毒L慣用嘅facebook就冇乜呢啲function，同志們惟有自己睇路。

假如劇透都可以買保險
坦白講，對一般MCU電影，我其實唔係咁怕劇透。就算自己係fan屎都係咁話：佢哋啲戲本來就冇乜驚喜；加上有跟過吓原著漫畫，單睇電影預告，大橋點樣去、點樣改，多少估到兩、三成。不過今次《復仇者3》劇情似乎相當轟烈，可能遠超以往輕輕鬆鬆鄧梓峰嘅主調，搞到我都緊張埋一份。最慘因為事忙，今次要星期六晚先有時間入場；呢幾日上網我居都有剪電線、拆炸彈咁嘅feel。見依家啲人連出部電話都買份保險，忽然覺得「劇透保險」有得搞：「C兄，透得大賠得大，買份旁吓身都好吖！」

撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》（broadwayelectricchair）

source : https://hk.lifestyle.appledaily.com/lifestyle/special/daily/article/20180428/20375053
+++++++++++++++++++++++++++++++++++++++++++++++++++++++++++++++++
洗唔洗