毒L抬頭的年代。我唔知邊個發明「毒L最忌有自信」呢句嘢，但嗰位仁兄似乎相當無知。

早喺2003年，美國報章《USA Today》已經登過一篇名為〈Geek is Chic〉嘅文章，探討西方毒L（geeks）如何成為潮流寵兒。其時Bill Gates嘅電腦王國如日方中，電玩業界又越做越發，而Sam Raimi執導嘅《蜘蛛俠》亦都大賣——以往被視為騎呢怪嘅geeks，嚟到21世紀唔只躍身社會精英，仲反攻大眾文化口味。15年後今日，全人類最祟拜嗰件product係Steve Jobs嘅iPhone，全奧斯卡最威嗰部戲係一個毒L Guillermo del Toro拍嘅《忘形水》；仲有，全港最靚仔嘅geek係影帝古天樂。試問毒L仲使乜無自信？

我知好多毒L最叻葡萄：「呢啲人讀書叻、電腦醒、識拍戲，古天樂仲要天生靚仔，根本就係偽毒！」冷靜啲先。今日就同大家講一個百分百毒到漏汁嘅勵志故事。主人翁，係一個造型土、讀書差，淨係識睇戲睇漫畫嘅堅毒L—— Marvel Studio超級英雄電影嘅總指揮Kevin Feige（奇雲費治）。假如閣下出席重要場合嘅飲衫係Polo Tee加單吊西，搭一頂突兀到喊嘅棒球帽，好難怪人哋話你毒。但若然你係憑19部戲賺咗150幾億美金嘅Feige，就算着到毒L標本咁出席首映，Scarlett Johansson只會祟拜地嗌你一聲：「fanboy。」fanboy又好，毒L也罷，忠於自己喜好就係Feige最強武器。

幾年前同事訪問一位教畫老師，問佢學畫要乜天份。老師話：「鍾意，已經係天份。」照咁睇，Feige絕對係天才。細個讀書成績一塌糊塗，十一、二歲嘅佢只係沉迷科幻片、史匹堡同《X-Men》動漫。不過年紀輕輕佢已經立志大個一定要拍電影，而且係拍普羅大眾愛戴嘅爆穀戲──《星戰》、《星空奇遇記》、《奪寶奇兵》，仲有佢至愛嘅《超人》（1978年Richard Donner執導嗰部）。

除咗逢星期五晚蒲戲院，有時睇完戲唔滿意佢仲會「重拍」──《鐵甲威龍續集》、《超人第四集》、《星空奇遇記第五集》……佢腦裏面統統有自己嘅remake。呢啲十幾歲fans嘅FF純粹自娛，無人會畀錢買。但所謂「鍾意」本來就係一種「唔做唔安樂」嘅執念，根本同報酬無關。正如佢後來參與拍攝《變種特工》，死都要迫髮型師將狼人個頭梳到起角，搞到人哋發脾氣咁滯；明知有啲嘢正常人覺得低能，但毒L本能話佢知「唔做唔得」。對完全唔like《變種》系列嘅我而言，唯一有feel就係呢個忠於原著嘅髮型，結果狼人呢個頭一直keep到依家。

當年廿零歲嘅Feige能夠得監製Lauren Shuler Donner賞識，畀佢參與《蜘蛛俠》、《變種》等電影系列，以至後來被Avi Arad提攜加入Marvel Studio，都係因為佢對漫畫嘅執着。所以話做毒L點可以無自信？怕人笑，不如戒毒。

呢個毒L很堅強，很堅強，很堅強，很堅強。「鍾意」係成功毒撚先決條件，而呢份愛必須堅強。唔係一般強，而係李幸倪嗰隻，起碼要有四五個「堅強」。話說Feige高中畢業，成績好轉嘅佢入到大學，仲係佢一眾電影偶像入讀嗰間南加州大學。問題係一隻腳入已經咗校門，校內嘅電影藝術學院竟然又唔肯收佢。俾着鬥志弱啲嘅毒撚，俾人reject一次已經縮沙；但係Feige前前後後畀人「ject」咗起碼五次，屢敗屢戰。佢甚至諗過放棄入電影系，但就從來無一刻諗住放棄電影。憑住幾個堅強，佢最後成功入學，目標好快又轉到「入行」。為咗接近電影，Feige邊讀書邊做電影PA，每日淨係幫老細放狗、買飯、洗車，實際工作幾乎同拍戲完全無關。甚至因為呢啲雞毛蒜皮嘅雜務，佢連畢業禮都無行，因為佢心底入面早已經分咗輕重。推動成功毒L嘅係一份愛；而愛，係包忍耐。

一直覺得Kevin Feige有啲似德意志時代嘅「鐵血宰相」卑斯麥（Bismarck）。大家都係機會主義者，而且有雄心但唔貪心。正如卑斯麥當初無諗住吞併所有德語族群，Feige亦唔係一開始諗住搞咁大個漫威宇宙。當初佢同其他Marvel高層不惜出賣人物版權，借錢要自己開拍嘅，其實只係《鐵甲奇俠》、《變形俠醫》、《蟻俠》三部戲。後續嘅《美國隊長》、《雷神》以至Marvel Studio首部群戲《復仇者》，都係審時度勢、按部就班嘅決定。當記者問《復仇者3》導演Joe Russo，點解DC漫畫始終做唔到Marvel咁成功嘅電影宇宙，佢答案非常簡單：「They don't have a Kevin.」相信呢度講緊嘅唔止係毒到上晒頭嘅Kevin，亦係冷靜、有耐性嘅另一個佢。

Feige充滿盤算嘅一面，早喺入行之初已經睇到端倪。當年佢有機會跟偶像——執導《超人》嘅Richard Donner搵食，但最後佢偏偏選擇跟偶像嘅太太——資深監製Lauren Shuler Donner。原因，除咗因為監製權力比導演更大，亦因為Lauren工作量比老公多。結果證明佢真係無揀錯老細：全靠Lauren，佢先有機會接觸《變種特工》系列，為後來加入Marvel Studio鋪路。冷靜與熱情之間嘅拿捏，係想成功嘅毒撚需要學識嘅一課。

長篇大論講Feige呢個人，我只係有一個目的：勉勵毒L。我明，香港係有啲落後——毒L依然係大家避之則吉嘅標籤，但試諗吓，八、九十年代，當Feige廿幾歲人仲滿口superhero，唔通會俾人笑得少嗎？毒L嘅年代已經降臨，肯搏命，你都可能彈起。但大家要問吓自己：我有幾很堅強？

撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》（broadwayelectricchair）

source : https://hk.lifestyle.appledaily.com/lifestyle/special/daily/article/20180505/20381595
+++++++++++++++++++++++++++++++++++++++++++++++++++++++++++++++++
原來咁