「來自Matrix的教育局長」
今時今日香港政治之荒謬，經已去到「科幻」嘅地步……好似「廣東話係香港人母語」呢啲鐵一般嘅事實，教育局長居然左閃右避，簡直匪夷所思。喂大佬，你無阿媽生嘅咩？你喺Matrix玻璃箱爆出嚟架……？一出世你老母同你講乜話，嗰啲咪母語囉！你袋卅萬個月唔係要我教吓嘛？

「閹我把口等於閹我個腦：《Alphaville》」
語言係不能退讓嘅抗爭底線，因為佢係我哋思考嘅主要工具：你閹咗我把口，等於閹埋我個腦。「法國新浪潮」大師尚盧．高達嘅早期電影就經常探討語言同思想嘅關係。高達作品以艱澀見稱，不過佢1965年執導嘅科幻片《Alphaville》相對易入口，而且主題可堪細味。故事講未來城市「Alphaville」由超級電腦「Alpha60」支配，呢部電腦祟尚邏輯理性，打壓一切人類情感，甚至禁制所有感性嘅日常詞彙，結果市民全部變晒行屍走肉，不知感情為何物。

成件事聽起抽象，但道理其實一字咁淺：一旦語言裏面某啲字詞畀人「閹」咗，背後嘅意思、想法亦會被「閹割」。舉個大家熟悉嘅例子：假如「結束一黨專政」六隻大字他朝變成禁語，兩三代後嘅香港人可能變晒順民──因為同抗爭有關嘅終極想像已經隨着詞彙一併閹割。

「失去母語的喪屍：《Pontypool》」
語言之所以重要，除咗因為佢係思考工具，亦因為佢係構成文化身份嘅關鍵一環。冷血獨裁者希特拉早就講過：「要消滅一個民族就先要瓦解佢文化；要瓦解文化，就首先要消滅承載佢嘅語言。」粉碎一套語言，等於粉碎一個族群嘅身份認同，罪大惡極，絕無誇張。

加拿大導演Bruce McDonald就拍過一部超有創意嘅恐怖片叫《Pontypool》，描述喪失母語嘅恐懼。呢部成本極低嘅B級製作幾乎得一個場景──一間位於安大略省嘅小型電台。主要人物就三個咁大把：風格踩界嘅男DJ Grant Mazzy、監製Syndey Briar，同埋技術助理Laurel-Ann Drummond。基本設定望落單薄，但套戲有一條絕世新橋：透過語言傳播嘅喪屍病毒。故事講負責早晨節目嘅三位主角陸續收到報料，話市內多處發生原因不明嘅暴亂；暴徒彷彿神經錯亂，初則語無倫次，繼而發狂咬人。後來Mazzy等人收到一則亂入嘅法語廣播，內容竟然話「英文」呢種語言已經受病毒感染！尤其「honey」、「sweetheart」呢啲親暱詞語更加係高危，任何人一旦使用，即刻狂性大發！呢個時候，一群染咗「語病」嘅狂徒已經包圍電台，Mazzy等人想保住條命惟有出少句聲，真係要講嘢就只能用半桶水嘅法文交談……

有趣嘅係，《Pontypool》故事設定喺加拿大，於是背後又多一重喻意：加國有23%人口以「法語」作為母語，當中法語族群佔81.5%嘅魁北克省（Quebec），同英語族群嘅文化衝突尤其熱烈。導演McDonald將「英語」設定為受感染嘅「帶菌語言」，可能反映咗加國法語族群捍衛母語嘅強烈訴求，甚至視「英語」為喪屍病毒一樣嘅洪水猛獸。講到呢度，大家有無感同身受？

「被迫重新學習ABC：《Twilight Zone》」
講到喪失母語嘅恐懼，不得不提經典奇幻美劇《Twilight Zone》（迷離境界）。呢套單元劇以天馬行空嘅怪談見稱，當中80年代有集叫〈Wordplay〉，可以話係現今港人嘅惡夢：主角Bill Lowery係一名典型sales，由於佢公司轉型賣醫療產品，佢惟有臨急抱佛腳，死記一大堆醫學名詞；點知下苦功期間，佢發現家人、同事說話越嚟越古怪──明明只係普通一隻「dog」，鄰居竟然稱之為「encyclopedia」（百科全書）；簡單去食一餐「dinner」，同事竟然話去食「dinosaur」。最恐怖係身邊所有人都係咁樣溝通，似乎得你一個唔正常！故事發展落去，已經無人聽得明Lowery講乜，甚至阿仔發高燒入醫院，都要靠老婆把口打點。結局最後一個shot先真正悲涼：夜闌人靜，Lowery一個人攞起阿仔嘅小學課本，重新學過所有「生字」……求神拜佛，希望我臨老唔使對住生字簿，死記「魚丸子」同「西紅柿」。

撰文：阿雞

《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》（broadwayelectricchair）

source : https://hk.lifestyle.appledaily.com/lifestyle/special/daily/article/20180512/20388215
+++++++++++++++++++++++++++++++++++++++++++++++++++++++++++++++++
一套都未睇