大富翁相信好多人都玩過，但其實呢種千變萬化嘅桌上遊戲，唔係淨係擲骰咁簡單，仲有好多唔同寓意，好似出晒名做政治惡搞桌遊「美麗島風雲」嘅台灣公司，近日就推出咗名為《誰是強國人》嘅桌遊，內容影射港澳台同西藏被中國吞噬嘅情況，最尾當然引起中國不滿，仲連高雄舉辦嘅月光桌遊節都因為有中國廠商施壓而被迫退出，但另一邊廂，網上眾籌活動反應就非常熱烈，雖然仲有幾日先截止，但就已經比起原定集資額超出5倍。

《誰是強國人》嘅遊戲背景係喺2050年，一陣又一陣蟲型黑影，不停掠過霧霾之中。玩家可以選擇「熱烈歡迎強國同胞」同「堅壁清野防守到底」兩種策略，而每個國家登場人物亦有唔同設定，好似係港澳版圖，就有一男一女，男嘅就手持雨傘，女嘅就以女荷官造型示人，至於強國壞蛋角色亦有唔少映射，其中有怪獸就引用咗影星成龍嘅金句：「中國人是要管」做藍本，當然玩家可以選擇歸邊或者抗爭對底，淨係呢個題目都已經吸引咗唔少人「課金」，喺眾籌平台度畀錢支持，原定籌眾目標嘅$92,197台幣，但截至5月13日下晝「善款」已經去到$58萬台幣，佢哋仲話只要去到$60萬，所有捐款者仲可以得到以遊戲設定為藍本嘅5萬字實體小說。

網民點睇：
Philip Chan：本來中國佬唔搞屎棍可能籌唔到呢個數

Siu Chung Au：「港澳⋯等國家」，如果我說心動，會否犯上暴動罪？

邱竟瑋：或許遊戲設定中有「幫忙強國的港、澳人士」存在。這樣比較符合現實狀況。

https://hk.news.appledaily.com/local/realtime/article/20180514/58187814