https://hk.news.appledaily.com/breaking/realtime/article/20180519/58211293
https://video.appledaily.com.hk/mcp/encode/2018/05/19/3614383/20180519_ccm_08_w.mp4
【10:20】新巴回覆

「不動手，不守禮，不要臉，不認錯，緣份到了，幫手自然來。」無論人哋點講，都不為所動，先係做人至高境界。
話說喺周四(5月17日)下晝3點幾，讀者Edwin搭914準備過海，去到佐敦嗰陣，就有一個阿嬸同一個坐住輪椅嘅伯伯，帶埋工人一齊上車，巴士司機已經主動協助，阿嬸一上到車，就以為司機係佢私人請嘅，叫司機推架輪椅上車，仲要佢幫伯伯扣埋安全帶，「佢叫自己個工人坐低，話唔駛佢做！」
阿嬸自己就坐咗喺第二排座位，蹺起腳，拎住把紙扇撥呀！撥呀！成個慈禧太后咁，好鬼優雅架啫！難得太后微服出巡，搭巴士體察民情，但係小李子冇跟埋黎，所以你班蟻民，嗱嗱聲啦！唔係要太后動氣嘛！
見到呢個情況，喺俗世生活嘅司機叔叔要爆喇！仲模仿阿嬸嘅優雅撥扇動作，阿嬸嬲到即刻彈起，「駛唔駛我幫你揸埋車啊！」俗世司機話「我係負責揸車嘅！」有乘客睇唔過眼，叫阿嬸咪再講，阿嬸邊撥扇邊寸寸貢咁話「佢態度好我就唔會咁啦！」一臉冤枉嘅司機問「我態度有咩問題？」呢個時候，輪椅上嘅伯伯忍唔住，對住司機喝咗聲「咪嘈啦！」雖然唔知呢兩位係咩關係，但小編就覺得佢哋真係絕配囉！
擾釀咗成分鐘，上層有兩位男女乘客走落嚟幫手，阿嬸當然貫徹不動手嘅宗旨，但把口就冇停過，「我識做駛鬼叫佢！」「你哋有冇搭過架，係司機做架！」眾生皆苦，成車人畀呢個阿嬸阻住，仲要聽佢發表大道理，果真極度痛苦！
Edwin強調，佢絕對唔係歧視輪椅使用者，不過佢就認為，要人幫手嘅，態度應該好少少，唔係呼呼喝喝。「畀嗰少少錢，以為全世界欠咗你！」Edwin認為如果有需要嘅，應該去搭復康巴士。
小記覺得，如果阿嬸唔想整花對纖纖玉手嘅話，下次都係搭的士，或者搵返你個私人司機啦，費事又有人惹你動氣嘛！
新巴回覆事件稱，公司正了解事件。發言人指，新巴城巴全線專營巴士，均為低地台巴士，設有輪椅停泊區。輪椅停泊區旁貼有標示，說明輪椅位置設施的使用方法。公司會定期舉辦培訓課程，同時透過內部刊物、通告，以及車長手冊等渠道，教導車長在協助傷健人士上落車的事項。
當有輪椅乘客登車，車長需把巴士停泊於合適位置，降低車身，開啟上車門並以正確姿勢開啟輪椅斜板，方便輪椅乘客登車。如輪椅乘客有同行者，車長會指示及確保輪椅擺放於輪椅停泊區，把輪椅上鎖，扣上輪椅安全帶及側帶。
假若輪椅乘客沒有同行者，車長會先徵詢輪椅乘客同意，協助輪椅乘客上車並將輪椅擺放於輪椅停泊區，並指示輪椅乘客扣上輪椅安全帶及側帶。萬一輪椅乘客不能自行扣上輪椅安全帶及側帶，車長會徵詢輪椅乘客同意並提供協助。