【良心忠告】臨近Jupas選科最後修改時間，我地一班浸大學生，甘冒天下之大不韙，憑住良心同道德勇氣，同今屆DSE考生講一句忠告:
「有得揀，千祈唔好入浸大！」

舉四個重大理由畀大家聽，等大家知驚:

一、宇宙最苛刻普通話畢業門檻
好多人入嚟都唔知，浸大係全港唯一一間有普通話畢業門檻嘅大學。你讀完中小學九年普通話課程，入咗嚟浸大都會逼你讀普通話課程，一個星期讀3個鐘，考拼音對譯、電腦口試，唔合格就唔畀畢業。學生已經通過公投決議取消門檻，但科大、理大相繼改善措施後，只有浸大仍然死攬門檻，繼續殘害學生。如此野蠻，點入得過？

二、大陸學生佔用學位比例最高
唔好以為大陸學生多唔關你事。BU係全港最高大陸學生比例嘅大學，佔非本地生達94.2%（八大平均為76%）。事實上好多Department都會收多大陸學生，變相收少本地學生，從而推高Jupas分數，所以你睇Jupas分數報名，佢下一年都可以谷高。大陸學生仲專享高額獎學金，每個一年十七萬，就係無本地學生份。

三、中學型家長式 「全人教獄」
你以為入到大學，課程架構會唔同晒？錯喇，入嚟浸大，你唔係讀緊你想讀個Major，而係讀緊似足中學規格嘅通識課程，要學生讀中文、英文、數學、體育、普通話、宗教、社會科學、理科、商學、歷史、美術、演講（PS）等多不勝數嘅通識課程，質量參差，但全部都計入本科學位嘅Gpa，令你疲於奔命，最後先發覺原來四年光陰心力，都唔係用喺你本來想讀嗰科度；高層口號嘅「全人教育」，淪為學生嘅「全人教獄」。

四、假大空嘅國際化
有冇聽過浸大要搞國際化，提高海外交流機會？真係信佢一成，雙目失明。校長錢大康話有意「為每名學生提供到大陸或海外地區做交流生、實習或服務學習機會」，但原來「去山區教英文或協助建校」都計算在內。實際浸大海外交流機會實際上遠遠比其他大學都要少。

諸如校園極細、宿位短缺、AR極西、餐廳多蟲等問題太多，罄竹難書。希望DSE同學唔好重蹈覆轍，知道浸大嘅規定同問題，諗真D係咪要揀呢間大學，同樣DSE分數可能仲有好多好選擇。唔好好似我地咁，年年九成九人唔知頭唔知路入嚟中伏！JUPAS開放予同學作「更新課程選擇」時間將於5月23日截止，把握機會，做好決定！大家都快D tag DSE同學，話過佢知啦！