深水埗一間手機店日前被偷手機，職員翻睇天眼認住個賊樣。點知賊人之後再喺附近壽司店偷壽司，仲返嚟手機店蒲頭，企喺門口成半粒鐘，仲對住女店員儍笑，結果俾職員認出，咁就衰咗啦。

事發喺前日中午，26歲姓梁懷疑賊仔着住黑衫、黑白間條短褲同踢人字拖，先喺深水埗深之都商場對面間壽司店偷壽司，跟住行去商場地下一間手機舖外，對住女店員笑。女店員初時以為個男仔係欣賞自己，但見對方笑足半粒鐘就覺得怪嘞。女店員覺得個男人熟口熟面，突然醒起佢係早幾日偷手機個賊仔，於是通知老闆。老闆翻睇CCTV確認後就報警拉人。

據目擊者盧先生話，警員到場後認得個賊，話：「乜又係你呀！」賊仔一度反抗逃入商場，最後被捕。警方話周四朝早接到報案，警員到場將疑人拘捕，發現佢仲喺另一店舖偷壽司，且未能出示身份證。

片
https://video.appledaily.com.hk/mcp/encode/2018/05/26/3618864/20180525_ccm03AD_w.mp4