利=職員 法=法賓奴

利︰歡迎加盟利記，你依家咩心情？

法︰多謝，我好開心，對於轉會利記我好興奮，係我一直渴望嘅事，利記係一間好偉大嘅巨型球會，球會嘅設備都好優良，我好期待未來喺球會嘅日子及即將首次著起利記波衫上陣嘅體會，好想知利迷點樣歡迎我成為一份子。

********************
利︰可唔可以講下過去一星期發生嘅事？球季其實啱啱先完結。

法︰我知道轉會會好快落實，我都好希望轉會盡快塵埃落定，轉會窗啱啱先開始，能夠咁快落實下季去向令我好開心。好高興加盟利記，而我預期好多美好嘅事將會緊接發生，我好想到利記參觀球會，好想知道未來嘅計劃，好想知道利記嘅運作等等，我對結果感到非常滿意。

********************
利︰你依家24歲，已經效力左摩納哥五季，你係咪都同意係時候接受新挑戰？

法︰係，無錯！我加盟摩納哥時係一個寂寂無名嘅球員，但過去五年我成長左好多，過去五年嘅發展都好好，我好想借呢個機會多謝佢地為我做嘅一切，多謝所有共事過嘅領隊，仲有球迷及班主。佢地帶領球隊升班，然後贏埋法甲冠軍，又打入歐聯四強。多謝佢地對我嘅信任，我加盟時無咩人認識，但我離開時好多人知我嘅名，對我嘅貢獻亦給予肯定。

********************
利︰你點樣形容自己嘅踢波風格？

法︰我認為自己統領球隊方面做得唔錯，我踢法硬朗，單對單防守方面頗強，不過亦因為咁拎左唔少黃牌，但我認為黎到英超問題唔大。希望我適應英超踢法方面唔會有問題，我知道英超踢法講求對抗性高及較多身體接觸，不過同樣情況喺法甲都有經歷，所以希望一切得心應手。

********************
利︰今季你多唔多留意利記嘅比賽？

法︰都多呀！球隊實力強橫，而且行軍快速，特別係轉守為攻反擊真係做得好好，令對手叫苦連天。我都有睇左唔少利記嘅比賽，都好有興趣對利記認識更多。

********************
利︰利記有咩吸引你加盟嘅優勢？

法︰有好多樣。首先正如之前所講，球隊嘅設備、配套都好完善，呢個係我選擇加盟嘅原因之一。其次其實以我所知利記都留意左我好耐，對我黎講呢樣野好重要，感受到利記好想我加盟，顯出我嘅價值。我對利市嘅認識日漸加深，但到目前為止仲未有機會親身同利迷接觸。網上或新聞報導都有講利迷有幾瘋狂支持球隊，我所見所聞都係好美妙嘅畫像。其他效力過利記嘅球員都對球會有讚無彈，佢地同我分享佢地嘅經歷，令人更加想盡快為利記上陣。利記又身處全球最佳聯賽之一。以上一切都係好正面而令我決定加盟嘅因素，總括黎講我好開心能夠加入大家成為當中一份子。

********************
利︰高普能夠令同佢共事過嘅球員進步，你覺得自己有邊D方面可以繼續進步？

法︰領隊同我講佢好希望同唔同出色嘅球員合作，我覺得自己仲好年輕，所以其實仲有好多野可以學習，而且有高普指導，我覺得自己仲有好多進步空間。高普嘅足球哲學或風格與我之前效力摩納哥時嘅理念截然不同，我對佢嘅過去唔太熟悉，但人人都同我講佢係一個好出色嘅領隊，所以我好想同佢見面及喺佢指導下踢波，我將會好努力聽從佢嘅教導，亦可以肯定將會獲益良多。

********************
利︰你下季將會與同胞費明奴並肩作戰，你之前有無同佢傾過轉會利記嘅事？

法︰有呀，我地有傾過利市其實係點，球會其實係點，亦都有傾過教練等等問題，所以透過佢嘅幫助我都對利記有基本認識。我地係國家隊見過幾次面，我知道佢係一個場內場外都好出色嘅球員，佢身邊有一班好好嘅親友陪伴。重點係當我黎到新環境，能夠有一個講相同語言嘅朋友協助下，相信好會更容易適應。

********************
利︰費明奴加盟利記後顯著進化成一個更出色嘅球員，呢樣野係咪都吸引到你想有樣學樣？

法︰我其實無深思熟慮過呢個問題！不過當利記呢類大球會向你招手，其實都唔需要考慮太多就下定決心轉會。自從費明奴加盟利記後，我的確有更多時間留意利記嘅人或事，費明奴嘅成功，其實係一面鏡，我都希望自己可以做到！

********************
利︰由於你都係歐洲生活左好幾年，你認為會唔會較容易過渡，再適應一個新國家新城市？

法︰我希望係喇！我希望係喇！

********************
利︰巴西國家隊黎緊星期日會到晏菲路球場作賽，雖然你唔會落場，但你會唔會入場觀戰呢？

法︰唔會喇，因為我放假去玩喇！我安排左同家人去旅行。如果我無安排行程又或者一早知有呢場比賽，我就一定會入場，不過好遺憾今次就唔會喇！

********************
利︰你預期第一次著起利記波衫比賽會係咩境況？

法︰我有幻想過好多唔同嘅畫面，我對呢一日好期待，急不及待呢一日快D來臨，呢一刻係我腦海有好多畫面，好多野都會係新事物新認識，我將會好好享受即將來臨嘅時光。

********************
利︰你喺利記將會有咩目標？

法︰我選擇加盟利記全因我想加盟一間有雄心壯志嘅球會，一間為贏得每項殊榮而努力嘅球會，利記絕對係其中一隊！我希望同利記創造一個屬於自己嘅一個足球歷程。個人層面上我希望贏得更多冠軍之餘，自己都會繼續進步，並成為球會輝煌歷史嘅一部份！

********************
利︰最後，有咩想同利迷講呢？

法︰我加盟就係想幫球會取得成功！我知道利記有幾偉大，所以落到場我一定會盡自己最大努力去幫助球隊爭取勝利。我希望他日大家會認同我嘅功績。

https://www.liverpoolfc.com/…/303618-fabinho-exclusive-inte…

#LFC #YNWA #WeAreAnfields12th #A12HKMO #A12OLSC





https://www.facebook.com/a12hkmo/photos/a.189501317739005.40221.189500301072440/1812386575450463/?type=3