朋友高健出加密幣Likecoin，FB唔容許佢落有關Likecoin廣告，間接有關都唔得。FB早幾個月前已經宣佈，加密幣被打入廣告敏感詞，寧枉不縱。你可以拗其實加密幣都有好人，例如Likecoin，亦可以理論把尺使唔使咁緊，但重點係，正如高健講，FB已經中央集權到一個點，好多決定都可以帶來唔健康的影響。

第一次創業是2006年。那時候互聯網行業正興起社交網絡不久，大家都只係想自己個網絡越多人用越好，我敢斷言，行業大部份創辦人起初都無諗過要點樣統治世界，FB，Twitter，IG甚至Google，成立之時都完全無可預見的路徑會大到好似今日咁。但摸着石頭過河，一大輪吞併淘汰，大者越大的network effect之後，剩低的就變成今日全球級巨無霸式的aggregator。

創辦人或多或少是技術人心態，但網絡世界偏偏是離不開人事的行業。任何做過社交網站留言板等公司的人都清楚，互聯網釋放了大家發佈，包括所謂不好的發佈，要處理，即是做埋道德判官，煩到七彩，而這麻煩的一面，就是成功的代價，叫做代價，因為班科網人最憎諗呢部份，從未見過有人做這行是貪有得做道德審判。

社交平台被迫當道德判官
行業以前最興講：我哋只是平台，平台上發生的事情，最好用戶自理，唔關我哋事。但趨勢是平台影響力越大，越來越有公眾壓力變得有為。例如Spotify前排開始拒絕宣傳私德有問題的歌手如R Kelly，以且把歌詞鼓吹仇恨的歌曲下架。又例如Twitter開始用程式主動把疑似惡意留言滅聲，有得留言但人哋睇唔到。這類做法不難理解，我自己播YouTube畀個女睇，都成日守住唔好俾YouTube自動播那些用配上18禁聲音的Peppa Pig。但問題是，換轉以前，HMV唔入你隻碟，仲有萬九幾間大中小舖頭，而家全球級的Spotify唔受你玩，你首歌基本上等於在地球不存在。

有時甚至乎權力大到巨無霸自己都驚。處理全世界最多互聯網流量的網絡護衞公司Cloudflare，一向講明永不拒載。其中有個客是著名的美國新納粹網站，Cloudflare成日因此捱批，CEO被煩至有一日頂唔順，一怒之下決定不再做那單生意。結果CEO冷靜落來之後寫blog告解，覺得自己竟然一個心情唔靚，就可以令一個網站因為言論已幾近被消失，是非常危險的事，於是四出搵方法移除自己這支權柄，令人諗起似Frodo想交隻魔戒畀Gandalf，Gandalf耍手擰頭那一幕。

本來FB面對做道德判官的要求，可以不斷卸膊話盡力而為，但美國左派因為Trump當選，不斷要求FB處理fake news，焗咗FB加強自我審查能力。然後個unintended consequence輻射到地球其他地方，不難想像例如立咗廿三條之後，特區政府要求FB根據本地法律定義去操作自動審查fake news機制，就真係多謝哂。中央集權的政府搭上中央集權的資訊網絡，交配出數碼列寧主義這隻怪獸。Likecoin等其中一個理念，正正就是製造利益誘因，以逆轉network effect去抗衡FB等大者越大的網絡中央。當中的邏輯，有機會再詳述。

撰文：宋漢生

source : https://hk.lifestyle.appledaily.com/lifestyle/tech/daily/article/20180531/20406045
+++++++++++++++++++++++++++++++++++++++++++++++++++++++++++++++++
乜鳩野，明呃錢