https://video.appledaily.com.hk/mcp/encode/2018/06/05/3625760/20180606_sub619newnewAD_clean_w.mp4


陳詠麟（Alan）由1986年墨西哥世界盃開始儲「畀你貼」，足足32年。

2018世界盃月中開鑼，足球的浪漫不只睇波，有球迷會追世界盃版波衫，亦有人儲世界盃貼紙。Panini世界盃「畀你貼」集圖冊可以說是球迷們的集體回憶，1970年開始推出，1986年香港正式引入，貼紙迷陳詠麟（Alan）小學雞年代開始儲起，1986年至2014年間儲齊八屆，今屆當然不會缺席。他準備了三大盒貼紙和記者開盒實貼，分享一些「畀你貼」趣事和儲貼紙心得。

Alan首先跟我們分享中伏經驗，「今年好似難買咗，去『7仔』買，佢話有，初初覺得有啲唔對路，返到嚟打開，係球星卡，唔係貼紙嚟。」Panini這間意大利廠推出眾多產品，NBA和各地聯賽的球星卡很受球迷歡迎，世界盃也有貼紙集圖冊和卡簿兩款。自小儲開的Alan就只儲貼紙，「買貼紙返嚟打開，發覺呢度有位，貼貼貼，好過癮。1986年我當時仲細（7歲），未識睇波，見到隔籬屋有人儲，屋企人喺書報檔買咗本已經貼好嘅返屋企。下一屆先開始儲，跟住幾屆儲開又冇理由唔儲。」

過往Panini貼紙各大便利店有售，集圖冊$30一本，貼紙就$5一包，一包5張。聽落似乎頗經濟，但其實儲齊一整本成本通常要過千元。「以前幾百蚊已經儲完，因為一隊波可能得出名嗰幾個人有貼紙，但去到2002年開始每隊波都有11個球員貼紙，仲會有隊相、隊徽、世界盃等閃卡貼紙。」打開1986年的集圖冊，只有二百多張貼紙，當屆冠軍阿根廷連球星馬勒當拿，也只有四個球星有貼紙，入面還有蘇聯、西德等現在沒有的國家，滿載歷史。最新的2018年俄羅斯世界盃集圖冊就有670張。Alan準備了三大盒，每盒有50包，共750張貼紙，和我們開箱實貼，結果貼完尚欠六十多張。


集圖冊$30一本，貼紙就$5一包，不過今年總數達670張貼紙，不易儲齊。


由1986年到2018年，九本集圖冊全部有齊。


Panini「畀你貼」世界盃貼紙，深受球迷歡迎。

近屆難儲齊　貼紙重複將來有用
「貼紙越多，開到後面重複機會率越高，可能開到第三盒已經大部份是重複，玩貼紙一定要和其他人swap（交換）。」Alan跟我們分享，集圖冊約貼了500張貼紙，有250張左右是重複的，之後就要開始尋找交換者。香港的集圖冊玩家也算活躍，在「香港Panini集圖冊貼紙同盟會」facebook專頁有約2,000名成員，臨近世界盃也會定時組織換卡聚會。Alan就介紹了一個貼紙迷必去的「Sticker Manager」網站，可以簡單有系統的記錄自己的儲貼紙進度，再和世界各地的玩家交換貼紙。

Alan打開貼紙包拿出貼紙時第一件事不是「搣貼紙」，而是逐張貼紙背面向上排好，再打開電腦和「Sticker Manager」網站，登入後輸入每張貼紙背後的編號，專業程度好比文書工作，極有系統。「Sticker Manager」會記錄玩家已有和重複的貼紙，可以在平台上搜尋其他人想要甚麼貼紙和能提供甚麼貼紙交換。近幾屆世界盃Alan都會用這個平台和世界各地的玩家郵寄交換貼紙。「每次世界盃都寄咗好多信，德國、英國、波蘭、瑞典等等都有，都遇過兩宗收不到貼紙嘅個案，如果遇到這個情況，可以給對方負評，幾好用。」

Alan上月尾用了約$1,000在外地郵購了集圖冊和三盒共750張貼紙，現在連交換尚欠約60張才儲完。不過他估計毋須再入貨買新貼紙，因為他累積了大量歷屆舊貼紙，可在「Sticker Manager」平台找到在搜尋舊貼紙的玩家，用舊貨換今屆新貼紙都得，如果你是今屆開始玩貼紙的朋友，就記得儲起多出來的貼紙，將來幾屆都用得着！


1990年集圖冊內的西德，現在已合拼成德國，集圖冊見證歷史。


1986年集圖冊內的馬勒當拿。


1994年集圖冊，知名度低的球隊尼日利亞以三個球員做一張貼紙。

Sticker Manager：
https://www.stickermanager.com

記者：司徒港燊
攝影：劉永發

source : https://hk.lifestyle.appledaily.com/lifestyle/special/daily/article/20180606/20411897
+++++++++++++++++++++++++++++++++++++++++++++++++++++++++++++++++
原來以前有咁既野