安卓盒子曾紅極一時，不過都差不多到落幕時候了！話說香港海關在5月底採取了一個名為「特洛伊木馬」執法行動，打擊售賣懷疑非法電視機頂盒，據知先後在深水埗與灣仔，掃蕩四間零售店舖，檢獲354部（約值32萬）懷疑非法電視機頂盒。

事前真係無跡可尋嗎？老實講，早成個月前，其實海關已經苦口婆心，四出行場兼派發宣傳單張，再同舖頭Sales講，唔好再賣！不過硬係無人聽；不過話時話，賣小盒子真係犯法嗎？據有關執法人員表示，其實小盒子相當於是一部電腦，所以賣機都唔算犯法，不過好多時就係店員為顧客安裝一些「不明程式」，先會墮入法網。

不過話說呢類「不明程式」都相當多樣化吓！可以「直播」又或「點播」香港電視台節目，當然係拉硬你啦！不過有相關執法人員表示，就連安裝《騰X視頻》甚或《YouXube》等程式，都可能觸犯法例，大家真係嚇一驚喇！所以場內人的解決辦法，小盒子就盡量收起唔賣；至於顧客真係有特別需要，都只會在倉底試搵吓，不過一定要係「清湯掛麵」嘅「乾淨機」，至於任何安裝服務，自此一律免問。

賣小盒子、搞到要拉人封艇，其實曾經發生過嗎？據影音場內Sales表示：「又真係未試過喎！話說對上一次海關採取大型行動，可追溯至『CCTVB』出小盒子之時，不過當年都係派吓宣傳單張就了事；今次可能是世界盃臨近，又咁啱『how TV』出小盒子，海關今次還非常認真執法兼拉人扣貨。老實講經此一役，好多舖頭老闆都話，為了蠅頭小利而惹上官非，始終有點不值，可能小盒子的末日，會隨着今年的世界盃而來臨。」

記者：朱崇德

source : https://hk.lifestyle.appledaily.com/lifestyle/tech/daily/article/20180606/20412111
+++++++++++++++++++++++++++++++++++++++++++++++++++++++++++++++++
其實用舊手機算