專欄作家屈穎妍推出新書《既是紅底又如何》，今日發布會上，有支共全國政協副主席梁振英、「幫港出聲」召集人周融，同埋前新聞統籌專員馮煒光現身支持。各人都有嘢發表，梁振英就同大家分享愛國情懷，又讚屈穎妍寫嘅文章，夠晒敢言直說。

梁振英話，1982年，英國同阿根廷為爭福克蘭群島主權打仗，當年所有英國人，即使大部分人從未去過當地，都會支持政府透過軍事手段爭取，英國王子甚至上船成為遠征軍一分子。梁振英以此為例，說明愛國呢家嘢，「不分古今、不分中外、自然而然」。

佢又話，讀政論文章最怕吞吞吐吐，屈穎妍嘅文字就夠晒敢言直說，讀起嚟大快人心：「於社會政治而言，無論紅底不紅底，香港都需要更多屈穎妍。」

之後到屈穎妍講嘢。佢話紅底並不可怕，愛國更加要坦然承認，希望自己嘅文章能夠影響別人，等大家同樣勇於承認自己、表達自己。佢又鼓勵讀者，唔一定要有個「地盤」，先可以發表心聲，最緊要喺日常生活中實踐。

屈穎妍補充，從來都唔會自我標榜為「紅色」，只承認自己係中國人：「只不過喺香港，一切同中國相關嘅，別人都會標榜為紅色。」馮煒光就提到，中華人民共和國國旗係紅色，「中國人自然就係紅」，係政治現實嘅問題。


梁振英話，香港需要更多屈穎研。