https://hk.news.appledaily.com/breaking/realtime/article/20180618/58333359

最近有一套以恐龍為題材嘅電影上映，片中嘅恐龍被人捉咗出大都市。禮拜一朝早有一隻「恐龍」張牙舞爪出現喺香港國際機場接機大堂，金睛火眼望住出嚟嘅人，吸引唔少人注目。原來恐龍真身係個哥哥，等緊嘅「獵物」係外國歸來嘅妹妹，希望畀個驚喜佢。

讀者劉先生禮拜一朝早準備同家人準備出發外遊，喺接機大堂A出口見到一隻恐龍雙手扶着欄杆，頭岳岳喺閘外望穿秋水。冇幾耐一個女仔同爸爸媽媽出嚟，一見到恐龍就大喊：「哥哥！」而恐龍哥哥亦回應話：「阿妹，我等咗你好耐！」阿妹見到恐龍哥哥，忍唔住興奮到跳起，又摸下佢個頭、握下佢手，之後仲攬到佢實一實，笑到四萬咁口影相留念。

劉先生估計阿妹出國一段時間，所以哥哥先着住恐龍模型服?佢開心，仲等阿妹安頓好先換番衫，原來恐龍哥哥真身係一個戴眼鏡、打扮斯文嘅男仔。劉先生睇見呢一幕覺得好感動，話通常男仔對女朋友先會咁花心思，估唔到恐龍哥哥為妹妹一樣落足心機，仲覺得自己好幸運可以見到呢個溫馨和平嘅場面，「好sweet，希望社會可以多啲愛！」



===================



嘩，妹妹真係好可愛