「四年一度喪失語言能力」
望住圍內朋友嗰個WhatsApp group，我滴晒汗：一晚三百幾個留言，我無一句答到嘴。

本來group入面廿幾人都係電影、動漫群組認識，平日傾得最多就係毒L話題。講Marvel電影、Netflix新劇，我動不動打一百幾十字；點知一到世界盃，呢度就變咗直播室，球場花生連珠炮發，可憐我簡直喪失語言能力。「梅拿、奧斯爾、基迪拉，國寶級瘀血」、「卡華奴，足球界嘅Firefox」……見佢哋抽水抽得咁過癮，真心想吹埋一份。奈何大腦構造唔爭氣：但凡講求戰術嘅團體運動，我一律消化不良。
最陰公係足球帶嚟嘅社交障礙仲會延伸到現實世界。平時玩開班friend掛住睇世界盃，諗住約舊同事食飯傾吓偈啦……點知兩個女仔竟然千叮萬囑，要去有波睇嘅食肆。隔籬枱麻甩佬講波盤興高采烈，我同事就研究佢「老公」C朗嘅眼神，一樣講到眉飛色舞。「老公」入波，同事紅都面晒跳起yeah，開心過收結婚戒指；難為我連邊個係C朗都未認到，擘大口得個窿。諗起當年喺電視睇《足球小將》，啲角色明明一樣樣，反而全部噏得出名；但係世界盃無猛虎射球，無小志強射爆波，我即刻投入唔到。如果足球係國際語言，好不幸，每四年我就有一個月講唔到嘢……

「我淨係識呢啲波：球類Cult片推介」
我絕對唔係歧視足球，亦無資格（唔識波俾人歧視就有份）。只不過要我對一種嗜好產生興趣，佢必須有古仔、有劇情。我知、我知——球場上一樣有恩怨情仇，每個球星背後亦大把辛酸史，但係我唔識吖嘛。世界盃就好似幾百集長劇，角色多記唔到不在話下，戲份仲分分鐘橫跨幾年——邊隊當打、邊隊當泵，唔追番一兩個season根本理解唔到。仲有腳法、佈陣、戰術、球例……呢啲基本概念我統統唔曉，等於睇戲唔識電影語言；作為固執到無可救藥嘅處女座，咁樣睇戲好難有癮。
假如閣下同我一樣唔睇識波，嚟緊大半個月怕且好難過。以下落嚟為大家準備咗一堆同球類運動有關嘅電影，有笑片、劇情片，仲有估佢唔到嘅騎呢紀錄片，而且每部幾乎都無欣賞門檻，希望喺唔講嘢悶到口臭嘅日子，佢哋可以陪你共同渡過：

1.《賭俠1999》（1999）
呢套唔使多介紹啦：「張家輝飾演化骨龍飾演朗拿度」早已經成為睇幾多次都笑得出嘅經典。加上經典對白「X你個街亞視嚟嘅」深入民心，後來亞視自己嘅宣傳片都忍唔住借嚟自嘲一番。
預告片: https://bit.ly/2KcCwHi

2.《少林足球》（2001）
一向覺得星爺係不折不扣嘅毒L，佢好多作品靈感往往嚟自日本動漫：參考同名格鬥漫畫嘅《破壞王》，受《伙頭智多星》啟發嘅《食神》，仲有由《足球小將》演變出嚟嘅《少林足球》。星爺盡得高橋陽一精髓，以超現實嘅絕招娛樂眼球，觀眾完全唔識睇波球一樣可以enjoy《少》片。（據聞高橋陽一當初畫《足球小將》嘅時候完全唔識足球）
https://bit.ly/2texJvb

3.《Escape to Victory》（1981）
不折不扣嘅足球電影，由史太龍、米高堅主演，仲有多位現實中嘅球壇名宿客串，包括足球之神「球王比利」。故事講述二戰時期，一班盟軍戰俘被安排同納粹德國國家隊作賽，但戰俘隊竟然計劃喺球賽中途大逃亡……。可能因為美國人唔睇足球，套戲當年票房麻麻，但《足》片其實拍得相當熱血，可以話係另類戰爭片遺珠。比利喺戲入面表演神乎其技嘅腳法，亦證明最上乘嘅足球的確係國際語言，無論你識唔識波都會覺得賞心悅目。
https://bit.ly/1hOZ3Hg

4.《Eyeshield21》（2005）
波唔一定係圓嘅。日本動漫《Eyeshield21》就揀咗兩頭尖嘅美式足球作為題材。漫畫版其中一項高明之處，係編劇稻桓理一郎嘅解說功夫：美式足球對亞洲讀者無比陌生，但稻桓有本事將球例巧妙融入故事，唔止無阻礙劇情推進，仲可以從中製造高潮同笑料！負責作畫嘅村田雄介擅長用象徵手法表達球技：球員嘅防守範圍佢會畫成防護罩，人海式進攻佢就畫成散彈槍，生動過癮之餘簡單易明。因為《Eyeshield21》，唔好體育嘅我竟然學識睇美式足球，可見作者功力深厚。故事節奏亦比好多運動漫畫爽快，適合輕鬆閱讀。動畫版本喺香港播映時，配音組加入大量高登術語，大獲網民好評。
https://bit.ly/2K90no0

5.《Any Given Sunday》（1999）
畀《Eyeshield21》挑起你睇美式足球條癮？咁就強烈推介你睇呢套《Any Given Sunday》。如果稻桓理一郎嘅漫畫賣嘅中學生青春熱情，咁影帝阿爾栢仙奴伙拍大導演奧利華史東，賣嘅就係終極嘅男人浪漫。導演將美式足球拍到戰爭片一樣，部份場面甚至加入飛機大炮嘅音效，令每場波壓迫感爆晒燈，睇到人熱血沸騰。而戲入面嘅球場就係男人證明自己嘅戰場，無論過氣教練定球壇新星，落場殺敵之前都要先搞掂各種男人心魔。
https://bit.ly/2lndzdR

6.《Baseketball》（1998）
你無睇錯，我亦無串錯——部戲的確係叫《Baseketball》，即係棒球加籃球。現實中，「Baseketball」真係一種導演曾經發明嘅遊戲，玩法糅合「射籃」同「上壘」兩個概念，而且比賽期間雙方球員可以靠「謾罵」、「廢噏」騷擾對手……一聽就知，個game根本係五體不動嘅毒L先諗得出嘅騎呢主意。男主角係《South Park》原作者Trey Parker同Matt Stone，兩人對劇本畀咗唔少建議，套戲亦貫徹佢一貫cheap cheap幽默，fan屎大可以放心服用。
https://bit.ly/2lnTZ1n

7.《Dodgeball》（2004）
假如你細個有玩過《熱血高校》，呢部講「躲避球」嘅狂想式笑片一定啱你。Ben Stiller喺片入面極盡低俗之能事，個人認為係佢被受忽略嘅精采演出。
https://bit.ly/2M7kL9w

8.《Murderball》（2005）
關於「輪椅欖球」嘅紀錄片。聽落悶到抽筋？錯！呢種玩意簡直係殘障運動界嘅X-Game：用嚟作賽嘅輪椅全部經過特別改裝，車頭裝咗鐵鏟一樣嘅超硬淨泵把，目的係全速將對手鏟到飛起！參加比賽嘅朋友有啲無咁隻手，有啲切咗對腳，但眼見佢哋skinhead、長鬚、成身紋身，你行得走得都唔敢惹佢！對《Murderball》一眾主角嚟講，純粹「殘而不廢」根本不值一哂，「殘得嚟有型」先係至高境界。
https://bit.ly/2KaEM1B

撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心：放棄治療部》（broadwayelectricchair）

source : https://hk.lifestyle.appledaily.com/lifestyle/special/daily/article/20180623/20428870
+++++++++++++++++++++++++++++++++++++++++++++++++++++++++++++++++
Any Given Sunday 好野來