科技園董事局主席兼行會成員羅范椒芬本月底任滿，政府並未讓她續任，消息指因為她與創科局長楊偉雄不咬弦，二人關係差令推動工作有一定困難，特首林鄭月娥決定換人。楊偉雄公開表示與羅范的關係是「和而不同」，而羅范知道後表示自己有反思，但希望所有人都能坦率地互相交往，如果對她有不滿請告訴她，言下之意即是大家明刀明槍，唔好淨係識篤背脊。大家拳來腳往，相信仲有好戲連場。

無經驗人脈　壓不住建制精英
另一邊廂港鐵同運房局一樣暗戰頻頻，路政署要港鐵公司就沙中綫醜聞交報告，港鐵竟然夠薑話端午節公眾假期冇人工作，假期之後先至交。發生醜聞仲可以寸到咁，真係少見。但大家只要回心一想，在馬時亨主席眼中，會睇得起陳帆局長嗎？莫講話陳帆，就算係張建宗及林鄭月娥都不會放眼內，馬時亨做問責官員時，林鄭應該剛由倫敦陪仔讀完書回流當民政事務局常秘。
問責官員之所以無法駕馭法定機構，首要是人的問題。香港有資歷、有人脈的精英，若要出任公職，一定選法定機構，而不會入熱廚房當問責官員。原因好簡單，法定機構乃山寨王，可以稱得上是冇王管之小軍閥。港鐵董事局內除官方代表包括陳帆、劉怡翔、發展局及運輸署兩位公務員，其他全屬「圍威喂」自己友，如石禮謙、方正、陳黃穗，過去幾十年，公職委任就落入呢棚毫無建樹之舊電池。於是大權就落入高薪管理層之手，當日隱瞞超支公眾譁然叮走總裁韋達誠，2016年初馬時亨接替錢果豐出任主席，為期三年，希望可以執正港鐵管理層，行政總裁一職改由土炮梁國權頂上，不再向外招聘。今次沙中綫醜聞再次揭露港鐵仍然是個欺上瞞下嘅獨立王國。而陳帆亦根本唔夠班當局長，只不過得林鄭月娥「欣賞」，結果水鬼升城隍，執掌近十年由鄭汝樺、張炳良以降，最容易出事之「三煞位」運房局。大家只要望一望所有相關企業及法定機構，你就知道低水平問責官員，係冇辦法應付。港鐵主席馬時亨，乃特區第一批問責局長，機管局主席蘇澤光及總裁林天福，港英政務官出身，在法定機構打滾多年。市建局主席蘇慶和90年時已經是房協總幹事，又曾在新鴻基地產做執董，陳帆監督之專營巴士公司九巴背後又是新地，蛋散局長在地產、房屋及公營機構人脈全無，除了「亮劍」、寸嘴窒泛民議員以討好中聯辦之外，對政策及監管法定機構「識條鐵」咩！
所謂高官問責制淪為濫竽充數，招攬一棚對政府體制、傳媒、政黨關係及相關法定機構毫無人脈兼且冇政策認知之徒，這就是香港管治體制崩壞之根源。這也怪不得法定機構的負責人跋扈囂張，你問我運房局正副局長，連一個只有五年採訪經驗的記者也會藐爆，何況90年代已上位的港英時代建制精英。
即使林鄭月娥，在港英建制精英眼中，也不過是有勇無謀的「好打得」，江河日下，香港之大敗局，就在於「水鬼升城隍」這五個字。

劉細良
時事評論員
https://hk.news.appledaily.com/local/daily/article/20180625/20430644