https://video.appledaily.com.hk/mcp/encode/2018/06/25/3639630/20180626_sub653finalAD_mp4_w.mp4


殘障人士可以藉着水的浮力，在水中做出不同動作。

你有無諗過假如自小雙腿失去活動能力無法走路，需要長時間坐輪椅，有日突然能夠活動返而且行動自如，你會有甚麼感覺？

今年29歲的黃少川（Terry），出世幾個月就因為一場高燒，令腦部神經受損，導致下肢無法走動。26歲的陳嘉敏，三年前亦喺毫無先兆嘅情況下，雙腳逐漸失去活動能力，同時雙眼亦都急速退化，由起初還能夠依靠枴杖走路，後來要用四腳架，到最後要坐輪椅出入，直到現在醫生都找不到病因。嘉敏同Terry嘅經歷雖然好唔同，但係佢哋面對嘅問題都係一樣，唔能夠好似一個正常人咁活動自如，亦唔容易參與及享受運動帶畀佢哋嘅樂趣。潛水教練戚本乙（Benita），本身喺青年智庫做外展及研究工作，今次喺文華潛水和路向四肢傷殘人士協會嘅協助下，排除萬難舉辦咗呢一次潛水體驗活動，畀嘉敏同Terry感受潛水嘅樂趣。


這次的潛水體驗，令身體有殘障的Terry和嘉敏畢生難忘。


Terry（左）出世幾個月就因為一場高燒，令腦部神經受損，導致下肢無法走動。


陳嘉敏的身體在幾年前突然急劇轉差，至今要坐輪椅出入，但疾病的成因仍然未明。

對於嘉敏和Terry，潛水可能係一項不可能完成嘅任務。雖然如此，係未正式落水之前，佢哋都感到無比興奮，試想想一個下肢唔能夠活動嘅殘疾人士，藉着水裏面嘅浮力，能夠大大提升佢哋嘅活動空間，雖然始終唔能夠好似正常人咁活動自如，但係對佢哋嚟講，比起要依靠輪椅走動已經有好大嘅分別。Terry有一點怕水，所以喺剛開始嘅時候非常緊張，唔能夠喺水中正常呼吸，要經過一段時間先能夠適應。至於嘉敏就比較容易適應在水中呼吸，好快就可以喺水裏面自由活動。嘉敏同Terry喺水裏面其實好似普通人一樣，積極咁跟隨教練指示，嘗試做好每一個動作，相信在場每一個人都能夠感受到佢哋成功完成動作嘅喜悦。


潛水教練Benita，特意舉辦了一次潛水體驗活動，讓嘉敏和Terry感受到潛水的樂趣。


給予殘障人士機會去嘗試不同的事物，已足以為他們帶來自信。

呢一次潛水體驗，對於一般人可能係好簡單嘅事，但係對於嘉敏同Terry嚟講，就已經係一個好難忘、好有意義嘅經歷，另一方面，教練Benita覺得佢哋兩個嘅學習情況，都帶畀佢全新嘅角度去睇返潛水呢一件事。其實殘障人士唔一定只能夠選擇放棄所有娛樂及運動，只要社會能夠做多啲嘢去支持佢哋，其實佢哋嘅生活都可以同普通人一樣，可以去嘗試接觸唔同嘅新事物，以及就自己興趣去參與唔同嘅運動，就算最後佢哋未必一定學得識，但係能夠嘗試參與，已經可以為佢哋帶來自信，殘疾人士一樣可以活出一片彩虹。

採訪：余仲榮
攝影：余仲榮、陳漢良
剪片：陳漢良

source : https://hk.lifestyle.appledaily.com/lifestyle/special/daily/article/20180626/20431391
+++++++++++++++++++++++++++++++++++++++++++++++++++++++++++++++++
唔係話乜，開心吓，唔洗咁沉重