身為整容大國嘅南韓，每次選美都俾人笑啲佳麗係同一個模印出嚟咁，唔少人都笑話似係整容診所嘅對決多啲。不過今屆2018韓國小姐決賽冠軍就終於為南韓女仔吐氣揚眉，話畀全世界聽南韓其實都有真・美女！



噚晚喺首爾奧林匹克公園舉行嘅2018韓國小姐決賽總共選出一名「真」（冠軍）、兩名「善」（亞軍）及四名「美」（季軍），當中最矚目嘅就係冠軍金秀敏。23歲來自京畿道14號嘅金秀敏身高1.73米，體重130磅，喺美國讀緊大學國際經營系，志願係成為一名國際記者。平時除咗唱歌、跳舞之外，佢仲更加擅長外語同模仿別人嘅聲音。同好多其他選美冠軍一樣文又得、武又得。



不過同其他佳麗唔同嘅係，有好多網民都覺得佢係天然美女，冇整過容，冠軍攞得實至名歸。仲喺網上大讚佢個樣最自然、唔似整過容嘅美女等等。

金秀敏當選後就話難以置信，本身冇太大嘅期望，之後會一直提醒自己永遠唔可以自滿，一直保持初心努力做好每一件事情。

除咗保持初心，希望佢以後都會繼續保持「初型」啦！